BJP-i Himachal Pradesh election nung takok tulu angutsü imlar

Shimla, November 09 (Agencies): BJP-i Himachal Pradesh Assembly elections nung takok tulu angutsü imlar; parnoki iba state nung menden 68 nungi menden 60 nungbosa takok angutsü imlar.
Himachal Pradesh election nung BJP Chief Minister candidate, Prem Kumar Dhumal-i, “Onoki menden 50 dak tema nung takok angutsü nükjidong liasü, ajisüaka lokti tentet balala aika nungi onok pusemba osang jangjaogo, anungji onoki tajemba agi menden 60 nungbosa takok angutsü imlar,” ta metetdaktsü.
State nung terenlok mapa inyaktsü aser nübur ajak kümzüka alitsü atema inyaktsü, ta nangzüka Dhumal-i state nung chief minister asembenbubaren inyaktsü nükjidong lir.
Pa pusema Hamirpur nungi BJP MP, Anurag Thakur-ia, ”Mapang tongogo. Himachal Pradesh nungi auyartem Congress sorkar agientsü mapang tongotgo ta nüburtemi ratetogo. Sentsüh crore 50,000 dak tema aliba Himachal yimsüsütsü atema state-i Dhumal ama lenir tain nüngdaker,” ta ashi.
Himachal assembly elections atema taoba hopta Ato kilonser, Narendra Modi-i nüboyim sentong trok nung jembia liasü aser BJP National Tir, Amit Shah-i nüboyim sentong tenet nung jembia liasü.
Ano külen tang state nung sorkar tashi nung aliba party, Congress-ia iba election nung maneni takok angutsü imlar.
Tang Chief Minister teinyakdak aser Congress lenir, Virbhadra Singh-i, “Iba election nung majority angutsü imlar. Taruba sorkara Congress-isa akumtsü,” ta ashi.
Tanep 8:00 ako nungi tenzüka state kübok constituency 68 nung election agia nikongdang 5:00 ako tashi nung tembangogo.