BJP-i Hindu nung mesütsü meranger: Yechury

Agartala, Yimpoksüi (November) 27 (Agencies): Prime Minister Narendra Modi-i Deobarnü o jembiba ajanga BJP-i Ayodhya nung tekülem ki onük dak alaka tanga onük kecha bilema mali ta sayuogo ta Communist Party of India-Marxist (CPI-M) lennir Sitaram Yechury-i ashi.
Modi ya Prime Minister ka lir saka election campaign nung pai Ayodhya mangatettep ken o atema okadaki oshidang agütsüba meyiptsütsü amokmeren. Iba ya India sorkar nung tekolak kati jembiba memesük lir aser magizüker ta CPI(M) lennir Yechury-i Agartala nung osangbener den jembidang ashi.
Ayodhya ken o ya okadak benoka angadangba ken o ka lir aser Modi-i Linük Temzüng kübok tezüngzüktep agia PM aküm, anungji pai ozüng maparen ajembangtsü ta amokmeren masütsüla, ta paisa ashi.
“BJP-i 1992 küm Babri mosque raksatsüba ama tang-a Ayodhya nung kasa mapa inyaknür. 2019 general election nung rangloker parnoki Hindu nunger vote angutsü atema mapa inyaktsü meranger” ta CPI(M) politburo züngsem-isa shisem.