BJP-i Hindu nunger longjemtsü atema tesempatep adokdaktsür : Yechury

Agartala, October 11 (Agencies) : Centre nung Bharatiya Janata Party (BJP)-i Hindu nunger longjemdaktsütsü atema tangar memenepba tamangba yimsütem anema mapa inyaker, ta CPI(M) general secretary Sitaram Yechury-i ashi.
“BJP (Bharatiya Janata Party) ya RSS (Rashtriya Swayamsevak Sangh) atema yimtenren telok lir aser parnoki tanga tamangba yimsütem sempa inyaksangshiba ajanga Hindu nungertem longjemdaktsütsü meranger” ta Yechury-i ashi.
Rajya Sabha nung Communist Party of India-Marxist (CPI-M) züngsem Yechury-isa ashiba agi, BJP-i RSS tangatetba sülen anidaker aser lokti nung telemsa adokdakba mapa nung ajemdaker vote bank politics inyaker.
“Kechisarena nung jenjang atuba amala tongtipang onüktem nungi nübortem tebilemba anientsü atema parnoki iba ama shisa maka yimten mapa inyaker. Parnoki asen linük tsüngdang yanglushir bener aruba lipok otsü sayur” ta paisa aitsü.
“Sorkar yimsü asütsü tashi mangudang, BJP-i ‘love jihad’ indang jembi, sorkar yimsü asütsü tashi anguba sülen ‘ghar vapsi’ (homecoming) onük jembi aser tang parnoki ‘gau-raksha’ (save cow) onük jembir” ta CPI-M lennirisa metetdaktsü.
Bharatiya Janata Party (BJP)-i aniba National Democratic Alliance (NDA) sorkar ita 17 tashi yimsü süa arudang linük tesem balala nung tamangba yimsü dak sendakba lendong meyirjang aiben atalokogo, ta paisa ashi.
“Kaket aser ocet zülurtem Narendra Dabolkar, Govind Pansare aser M.M. Kalburgi nungertem tepsetba ajanga linük nung taremzük maliba sayur. BJP sorkari kaket aser ocet zülurtem o ozüng alema inyakertem tsüngda meputep tensa ka adokdaktsüogo” ta Yechury-isa ashi.
Tang Centre nung aliba sorkari RSS tesayuba nung University Grants Commission (UGC) aser linük nung tongtipang rejutem ajak ketdang asütsü meranger, ta paisa aitsü.
Narendra Modi-i prime minister inyaktsü tenzüker ita 15 nung ainleni 29 ben ogo. Onoki BJP lennirtem dang tamasa Parliament-i PM anir arung aser iba sülen ozüngi alema bener aoba sen meyipa bener arung ta shiogo. Prime minister-i Hindi film nung hero aser heroine ama anogo nung süoshi trokben tashi melener, ta Yechury-isa metetdaktsü.