BJP-i India ya Hindu Linük ka kümdaktsüner: Owaisi

Hyderabad, October 21 (Agencies): Ato kilonser, Narendra Modi-i, ‘Jai Shri Ram’ ta yimyim ayimba aija tanü AIMIM Tir, Asaduddin Owaisi-i, BJP-i aniba sorkar tongtibangtiba nükjidongji, India ya Hindu linük ka kümdaktsütsü lir, ta ashi.
Lucknow nung Dussehra benjung mapang Modi-i ‘Jai Shree Ram’ ta jembiba aija Hyderabad Lok Sabha MP, Owaisi-i, “Nüchiso anguba sülen lokti senden nung tamangba yimsü yimyim ayimba mezüngbuba Ato kilonserji pa (Modi) asütsü. India nung Ato kilonser aika inyaka aruogo aser ano aika inyaktsü, ajisüaka Ato kilonser kati danga tamangba yimsü yimyim mayim,” ta ashi.
“India nunger ajaki ya khen shisadangang- korang temesüng (Muslim nungeri asemba korang) asemer ka aser bangsemo awar ka Ato kilonser kümer ‘Allah-o-Akbar’ ta shira, tv channels ajak nung iba osang sangdonga, India ya Islamic linük ka kümogo ta jembitsü. (Saka) Modi-i tamangba yimsü yimyim ayimra, shiangaia mashishitsü,” ta paisa ashi.
BJP maneni aija Owaisi, “Nenok chichiba nükjidongji India ya Hindu linük kümdaktsütsü atema lir,” ta ashi.
All India Muslim Personal Law Board (AIMPLB)-i ayonga AIMIM party headquarters nung sorkari Uniform Civil Code (UCC) benokba anema longkak aitba sentong nung jembidang pai item o jembi.
“Nenoki secular atema bilemra, kechiba Modi-i Maharashtra nung nashishi nokdang aser kechiba ner sorkari Ayodhya nung Ram nüngtem nung museum ka lapokner ? Kechiba ner sorkari linük nung tamangba yimsü ka mali ta jembir?,” ta pai asüngdang.
“Ajisüaka ner sorkari linük nung Muslim nunger mezüngmeshir. Ner sorkari India nunger Muslim tem Pakistan, Afghanistan, Bangladesh, Sri Lanka Turkey, Indonesia muslim tem (affidavit nung) den medemdangba ajanga linük mezüngmeshiogo,” ta AIMIM tongti lenirisa aitsü.