BJP-i India ya ‘Hindu linük’ kümdaktsütsü meranger: Owaisi

Hyderabad, July 02 (Agencies): Honibarnü MIM tongti, Asaduddin Owaisi-i, Uniform Civil Code tenüng amer BJP-i India ya ‘Hindu linük’ kümdaktsütsü meranger, ta aitsü.
Hyderabad nung osangbenertem den jembidang Hyderabad nungi MP, Owaisi-i, Bharatiya Janata Party-i RSS onük ya benoktsü meranger, kechiyong panoki election mapang nangzükbatem nung tamakok nguogo, ta ashi.
BJP-i aniba sorkari Uniform Civil Code benoktsü atema Law Commission dang report ka meshiba dak sentakba nung Owaisi-i, “Mapa crore 1.5 agütsütsü, gas aser kerosene den rongsenkettsüng shia arudaktsütsü nung tamakok anguba sülen BJP-i RSS indang tongtibangtiba onük ‘Hindu linük’ benoktsü meranger,” ta aitsü.
Hyderabad nung IS züngsemtem südi ta melung melemi pua aliba dak sentakba nung pai, NIA-i pua aliba lanur pongu nem pai ‘legal’ teyari agütsütsü, ta ashi.
“Ni legal teyariji magütsütet nunga court-i parnok atema okatsür ka shimtsü,” ta paisa ashi.
Pai ashiba agi, NIA-i tai kar tonglokja parnok apu, saka tang pua aliba kinüngertemibo parnok dak tai maket ta shiogo.
“Parnoki aibelena ali asü mali, ibaji court-i lemtettsü aser iba obendangji ajaki agizüktsüla,” ta pai ashi.
Owaisi-isa, “Islamic State kiralongrartem aitsür rongnung ni mezüng lir aser maneni aitsür. IS ji kiralongrartem aser iba nungji tangatetba ana mali. Islamic shisashir ajaki parnok aitsüogo,” ta ashi.
Ken o aika nung Muslim lanurtem maitsüi court balalai chiokogo, saka parnok mapang aika amajok nung laluogo ta shia pai, “Parnok küm aika lalubaji  shiba khuret asütsü. Pa Muslim nunger ka asüyong taküm ka akhümket temeten pa dak mali ta mezüngshitsüla,” ta ashi.