BJP-i inyakba mapaji Naga putiotsü nung bilemtettsü: CCNTHCO

Kohima, Tsüklai 3 (TYO): BJP-i Joint Declaration agiba nungi atsüngzükba aser election nung tokteptsü lemtetbaji Naga putiotsü nung teti bilemtettsü ta Core Committee of Nagaland Tribes Hohos and Civil Organisations (CCNTHCO)-i ashi.
Aenjeti 29 nü political party temi Joint Declaration agütsüba nung BJP-ia pusema nungita liasü.
“BJP atema teshimtet nüboi tenangzükba nung sign asüba sülen parnoki ano election nung tokteptsü ta sangdong. Election nung tokteptsübaji parnok mulung saka nisung ajaki aginüba magizükbaji tesasatsüka aser parnoki inyakba mapaji putiotsü nung teti bilemtettsü” ta CCNTHCO convenor Theja Therieh-i ashi.
Ajisüaka, parnoki nübortem taginüba anema meinyaktsü atema tangatetba ka arutsü ta onoki imlar, ta paisa shisem.
“Küm 70-80 shi asenok timtema aruba atema asenoki election ka magii nübortem asoshi langka tajung ka inyakdi ta asüba nung kechi tetsükdaktsü lir. Onoki democratic inyakyim anema menoktaker kechiyong tang mesüra yasera election ji agitsüsa. Onoki ibaji khen magii ata liang ta ashirba dang” ta Theja-isa metetdaktsü.
Iba telemtetbaji India sorkar mesüra Election Commission-i masü saka Naga nungeri agitsüla, kechiyong election maparen jibo odang inyaktsü. Asenoki iba nungji adentsü asü mesüra madentsü telemtetba ka agitsüla. Luchii 15 Assembly Resolution ji nübortemi aginüba ama lir aser onoki iba telemtetba pusema noktakdang, kodaser parnoki atsüngzüker, ta paisa asüngdang.
“Naga nungertemi India sorkar nem osang takang ka sangoktsüogo saka Election Commission-i sangdong agütsüba meyipa agitsüla. Naga nungeri India tir nem osang sangoktsüogo aser Union Ministry of Home Affairs danga metetdaktsüogo” ta Theja-isa ashi.
“Interlocutor Ravi-i ajak angatetteptsü atema kanga meranga mapa inyaker saka pai mapang atakzüka magütsütet. Ravi aser olemtep aliba Naga telok anati mapang tatakzük ka agütsü asübo Election ya timtem kecha melii dang thinena yula” ta paisa ashi.
Tanü tongti kin hohotem den senden amendang CCNTHCO-i tashiyim mamshitsü telemtetba agi, ta paisa shisem.
Kin hoho temi mokdang junga magitetba atema Theja-isa ashiba agi, “mokdang alitsübaji mapang kanga jongdak nung sangdong aser iba jagi ajungalen magitet.”
“Candidate aika nüboyimba sentong tenzüka agidar aser iba jagi parnok meyipa aotsübaji tasak liasü. Kin hoho aika nung political party lennirtem aser züngsemtem lir aser parnok dak tashi lir. Ajisüaka, kin hoho ajakibo mokdang magizükaka, ajaki Naga yimten latettsü atema pusema nungiter” ta paisa ashi.
“Joint Christian Forum of Nagaland-i ayongba külem senden nungi tenzüker onoki bilemba nung takok tulu nguogo, kechiyong tang mezüng atema kin hohotem, civil teloktem, arogotem, political party tem aser linük tenzükertem ajak sabang ka nung longjem” ta Theja-isa metetdaktsü.
“NSCN(IM) aser NNPGs 6 indang Working Committee longjemer külem sangdong ka agütsü. Asenok ajak atema telemtetba ka agitsü atema parnoki joint coordination committee ka tenteta onüktem angatetteptsü imlar” ta paisa ashi.
Naga peace talks nung Centre atema Interlocutor R N Ravi-i CCNTHCO dangi shidi ka züluba nung iba election ajanga tang tagidak Naga yimjung olemtep nung tetsükdaktsü kecha majurutsü ta nangzükogo. Anungji, Ravi-i nangzükba ama inyaktsü aser Naga nunger ajaki agizüktettsüsa Naga yimten latettsü imlar, ta Theja-isa ashi.
CCNTHCO-isa political party tem dang Aenjeti 29 nü sangdong agütsüba akhümtsübutsü mepishia metetdaktsü.
Iba sangdong ya BJP-i raksa aser state nung terata aser mangatettep adokdaktsüba dang masü saka India sorkar aser olemtep aliba teloktem atema tetsükdaktsü bentsür arutsüsa tensa ka ajurudaktsü, ta CCNTHCO-isa ashi.
Asüng Amungnü Naga arogotem ajak nung tekaraba nung Naga yimten latettsü atema sarasademtsü ayongzüker, ta parnokisa shisem.