BJP-i IPFT dang election nung metokteptsü akhang; IPFT-i magizük

Agartala (Truipura), March 28 (Agencies): Tripura nung ruling BJP-i par teloktep party- IPFT dang Lok Sabha election nung metokteptsü akhang, ajisüaka tanü IPFT-i, tribals atema temeja state ka tentettsü atema election nung tokteptsü, ta metetdaktsü.
BJP dak alia Congress aser par teloktep INPT-ia IPFT dang Tripura West aser Tripura East Lok Sabha menden nungi par candidates metoktepdaktsütsü mepishiogo.
IPFT Tir aser Revenue Minister, Narendra Chandra Debbarma-i, “Tanep (Brihostibar) onoki rongdak senden ka amenba mapang nung menden anaprong nungi tokteptsü atema onoki telemtetba agiogo,” ta metetdaktsü.
“Bodhbarnü Tripura Congress Tir, Pradyot Bikram Manikya Debbarman aser INPT Tir, Bijoy Kumar Hrangkhawl nati onok (IPFT) ajurua onok dang Congress pusema candidates agientsü mepishi. BJP-ia kasaji akhanger,” ta paisa metetdaktsü.
Taoba mapang All India Radio station director, Debbarma-i Tripura East seat (reserve) menden nungi aser party nungi lanur, Brishaketu Debbarma-i Tripura West menden nungi tokteptsü.
“Onoki BJP dang Tripura East mendenji onok nem agüjang ta aiben mepishiogo, ajisüaka parnoki magizük. Parliament nung party-i state jenjang akhangtsü aser tanga onüktem akhangtsü atema IPFT-i item menden nungi tokteptsü,” ta paisa metetdaktsü.
2009 küm nungi IPFT-i Tripura Tribal Areas Autonomous District Council (TTAADC) ya temeja tribal state ka kümdaktsütsü akhanger.
TTAADC jurisdiction ya Tripura lushi asemsü nungi shilem anasü lir, aser yangji tribals timba ser nütsüng 12,16,000 dak tema lir.
BJP, Communist Party of India-Marxist aser Congress densema yimtenren party ajaki IPFT-i temeja state jenjang akhangba anema nokdaker.