BJP-i Irom Sharmila anema ken o benoktsü amokmeren

Imphal, February 13 (Agencies): BJP-i, Irom Sharmila Chanu-i la Thoubal constituency nungi Manipur chief minister, Okram Ibobi Singh den tokteptsü atema BJP-i la nem crore 36 den party ticket agütsütsütsü ta ashi, ta tai tongloktsüba atema lai kuli tejangja magütsütetra la anema ken o benoktsü, ta amokmerenogo.
“Lai jembiba o atema lai kuli tejangja magütsütetra aser la ajurur BJP lenirtem tenüng meshira la anema onoki ken o benoktsü,” ta party general secretary (administration) Thongam Biswajit Singh-i metetdaktsü.
Honibarnü Sharmila-i, yaküm August ita nung la lumiba anenba sülen Jawaharlal Nehru Institute of Medical Sciences nung BJP züngsem anati la ajurua la dang CM den tokteptsü atema sen crore 36 den party ticket agi mesüzüktsü merang, ta jembia liasü. Laisa BJP züngsem ana rongnung lai nisung kabo meteta lir, ta ashi.
Biswajit-isa, iba oji tamendakdak maka aser tiyazü lir, aser ibaji election mapang nung BJP tenüng menüktsütsü atema jembi, ta ashi.
BJP lenirisa, party ket nung sen crore 36 ji mali, aser parnoki sen agi election nung metokteper, ta ashi.
“Lai (Sharmila) tai tongloktsübaji yazü ta onoki meteta lir. Iba ya BJP anema yimtenren tasa tamajung ka lir, aser iba nungji Congress densema lir ta onoki melung malemer,” ta paisa metetdaktsü.
Centre sorkar nungi teyari nguaka state nung Congress sorkari totzü aser nüngdakba osettsüsettem bener maruteter ta aija pai, “Centre sorkari state nem central paramilitary sepai company 147 agutsüogo. Nisung asü-ama atalokaka matalokaka lenmang mokdanga alibaji lapoktsüla,” ta ashi.