BJP-i JD(S)-Congress teloktep sorkar anema ‘black day among

Bengaluru (Karnataka), Monupii/May 23 (Agencies): Tanü Bengaluru nung HD Kumaraswamy lenisüba nung Congress-JD(S) teloktep sorkar tenangzükba sentong agitsü lia BJP-i iba teloktep anema ‘black day’ amongba den külemi sendoka aliba Congress lenirtem dang BJP nung adentsü tayongzükba agütsü.
BJP-isa, tang teloktep sorkar tasenbai election mapang nung nangzüka alibatem meinyakra state tesem ajaklen parnoki longkak aittsü, ta metetdaktsü.
Anand Rao Circle anasa Mahatma Gandhi indang kürakyanglu matsüngdang longkak aitba sentong nung party nung inyakertem den jembidang BJP state Tir, B S Yeddyurappa-i, teloktep sorkarji maongka bushiba teloktep ka lir, ta aitsü. “Aluyimba loan sen crore 53,000 lir. Nenoki sentsüh ajakji atoktsü ta shiogo. Nenoki loan ajakji atoktsü asü matoktsüar onoki repranga atatsü. Nenoki ibaji meinyakra onoki state tesem ajaklen longkak aittsü,” ta paisa ashi.
Congress jenjang mejungi kümdar, ta shia Yeddyurappa-i, “State nung Congress jenjang makai kümogo. Asüng Congress-i shirnok dangi aotsü? Nenoki Kumaraswamy dangi aotsü asü,” ta asüngdang.
“Congress lenirtem mejanga aliba nungi saaktsüla. Ashiokja alirtem BJP dangi arutsü akok. Democracy nung tamang akaba party ji BJP lir. Asenoki Karnataka ya tatishitsü aketba state ka küma yangerdi. Ni iba teloktep sorkar aitsür,” ta paisa ashi.
Tanü ‘black day’ sentong nung taoba mapang deputy chief minister, R Ashok, MP Shobha Karandlaje aser BJP lenir Jaggesh nungeria shilem agia aden.