BJP-i Karnataka election atema manifesto saya; Rahul-i lutsü

Bengaluru, Monupii (May) 4 (Agencies): Rogonü (Hokolbar) Bharatiya Janata Party-i Karnataka nung election manifesto sayaba nung aluyimer nem loan agütsüba meyipa magitsü, kaketshir nem laptop agütsütsü, BPL tetsürtem nem smartphone aser nashi kümzüktsü atema commission ka tentettsü nangzükogo.
Karnataka BJP tir aser chief ministerial candidate B S Yeddyurappa-i sayaba manifesto nung BJP-i sorkar akümba sülen Congress sorkar kübok state indang senotsü inyakyim atema ‘white paper’ ka adoktsü, ta shia lir.
Aluyimertem yaritsü atema ‘Raitha Bandhu Market Intervention Fund’ ta ser sen crore 5,000 enoktsü ta BJP-isa ashi.
Parnokisa irrigation projects atema sen crore lakh 1.5, lakh 1 tashi nationalised aser cooperative bank tem nungi farm loans agiba meyipa magitsü aser küm shia aluyimba inyakyim angazüktsü atema aluyimertem Israel aser China-i yoktsü ta nangzükogo.
‘Vivaha Mangala’ scheme kübok Below Poverty Line (BPL) nungi tetsürtem kibong akümdang sen 25,000 den hon gram 3 agütsütsü. ‘Stree Suvidha’ Scheme kübok BPL tetsürtem nem sanitary napkins sen 1 yong agütsütsü, ta manifesto nungsa shia lir.
Jenjang dalang agi chiyungtsü angutsü atema ‘Mukhya Mantri Annapoorna Canteens’ 300 lapoktsü ta BJP-isa ashi. Tang Congress sorkari Indira Canteens ta ser tesem aika nung fast-food joints lapoka lir.
Siddaramaiah sorkari ochimashi inyaker t BJP-i tai tongloktsür aser parnoki Lokayukta indang office meyipa bener arutsü ta nangzükogo.
Parnokisa Karnataka Whistleblower Act ta ser ka yanglutsü aser iba ajanga ochimashi tuteta ashirtem miimbanga ayutsü. Congress-i anenja aliba “Gau Seva Ayog” tentetshitsü ta manifesto nungsa shia lir.
2012 küm BJP sorkari nashi kümzüka ayutsü atema commission ka tentet saka ibaji Siddaramaiah’er sorkari anentsü aser Animal Welfare Board nem iba mapa nungloktsü.
Aluyimertemi nashi scü ajanga sen aazüktsü atema BJP sorkarisa ‘Gobar-dhana Yojane’ ta ser scheme ka tenzüktsü, ta manifesto nungsa shia lir.
BJP-i ‘Mukhya Mantri Laptop Yojane’ ta ser scheme ka tenzüktsü aser iba nung college azünger kaketshir shia nem angati atema laptop ka agütsütsü. Ano, BPL kibongtem nungi tetsürtem nem ‘Mukhyamantri Smart Phone Yojane’ kübok smart phone angati agütsütsü.
Züngsem 224 agi akümba Assembly nungi menden 223 atema Monupii (May) 12 nü election agitsü aser Monupii (May) 15 nü votes azüngtsü.
BJP-i manifesto sayaba sülen Congress tir Rahul Gandhi-i “BJP Karnataka Manifesto ji Narendra Modi-i ajungmesoa yangluba lir, saka metokmeperi aika lir. Iba manifesto ajanga vote agütsür nem tagütsütsü kecha balaka mali. Nenoki Congress Manifesto zünger lira, iba (BJP) Manifesto nung mapang teindok” ta metetdaktsü.