BJP-i Left sorkar atsüngdoktsü atema kiralongrar amshir: Manik Sarkar

Agartala, Tsüklai 16 (Agencies): BJP-i kiralongraba mapa inyaker den yariteper IPFT amshia Tripura nung Left Front sorkar anema tasa atonga mapa inyaker, ta Tripura Chief Minister Manik Sarkar-i ashi.
Manik Sarkar-i tesüiba küm 20 tashi Trupura nung Chief Minister inyaka arur aser pai maneni kümsük pungububa inyaktsü atema meranger.
Modi’er sorkari telungpur Indigenous People’s Front of Tripura (IPFT) den tesentaktep lir saka Tripura nung alirtemi parnok anema noktaktsü, ta Sarkar-i ashi.
“Bharatiya Janata Party (BJP) ketdangsertemi IPFT pur amshir aser parnoki Tripura nung Left Front sorkar anema tasa atonger,” ta Communist Party of India-Marxist CPI(M) chief minister-isa shisem.
Arishi küm 69 tain Sarkar-isa BJP-i aniba Centre sorkari Tripura nung Left Front sorkar anema rongsenkettsüng tsütsü tenokdangba agüja lir ta tai tongloktsü.
“Parnoki tasa atongba rongnung IPFT lennirtem aser sorkar ketdangsertem, Minister in the PMO Jitendra Singh, Union Home Minister Rajnath Singh aser Prime Minister Narendra Modi nunger den New Delhi nung sendentem amen saka parnoki jembiba onüktem ajak miimbanga dang lir aser state sorkar den kecha melemsatep,” ta paisa metetdaktsü.
IPFT-i state balaka tentettsü takhangba agütsüba atema Chief Minister-isa ashiba agi, “Tripura nung alirtemi Tripura lemdangtsü merangba anema raratsü.”
“Telungpurtemi ‘Sovereign Tripura’ takhangba agütsür saka ibaji mapa küma meinyaktettsü. IPFT-i lisopur aser lisopur masürtem tsüngda telemsa adokdaktsütsü atema iba takhangba agütsür. BJP aser IPFT tsüngda tesentaktep yanglubaji tim masü aser iba ya Tripura lemdangtsü tangatetba nung yangluba dang lir, saka onoki ibaji matalokdaktsütsü,” ta Sarkar-isa ashi.
“BJP ya national party ka lir saka parnok indang policy kecha mali aser IPFT den tesentaktep yanglu. IPFT-i Tripura nung lisopurtem tarutsü raksatsür,” ta paisa shisem.
“IPFT-i BJP teyari agia Tripura indang tenüng puti otsü nungi ageintsü meranger. Anungji, Left teloktemi ibaji matalokdaktsütsü,” ta Sarkar-isa ashi.
2009 küm nungi IPFT-i Tripura Tribal Areas Autonomous District Council (TTAADC) nungi state balaka razüka aotsü atema takhangba agüja arur.
Tsüklai 8, 2018 nü Prime Minister Narendra Modi-i election nüboyimba sentong ka nung nübortem dang Manik Sarkar atsüngdoktsü atema tayongzükba agütsü.