BJP-i linük nem Modi 3 agütsü: Sidhu

New Delhi, Luchii (December) 2 (Agencies): Deobarnü Punjab Minister aser Congress lennir Navjot Singh Sidhu-i Bharatiya Janata Party (BJP) aitsü.
“BJP-i linük nem Modi asem agütsü- Nirav Modi, Lalit Modi aser Prime Minister Narendra Modi. PM Modi ya Ambani tepi nung mena lir” ta Sidhu-i ashi.
“Congress-i Gandhi pezü agütsü- Rajiv Gandhi, Indira Gandhi, Sonia Gandhi, aser Rahul Gandhi. Saka BJP-i Modi asem- Nirav Modi, Lalit Modi aser Ambani tepi nung mena alisang Narendra Modi nunger agütsü” ta pai nüboyimba sentong ka nung metetdaktsü.
“Congress-i iba linük British yimsüsüba nungi nüjiso ngudaktsü. Nenoki putiotsü dak ashishiteptsü makok. Jawaharlal Nehru, Abul Kalam Azad aser Sardar Patel ama lennirtem ajanga asangsang nung Nüjiso angu” ta Sidhu-isa shisem.
Prime Minister Modi-i Centre nung tashi mangudang mapa aika inyaktsü nangzük. “Ozüng alema sen bendenba bener aru mar? Nenok indang account nung sen lakh 15 ait mait? Ganga temerük kümer asü? Mapa crore 2 angu mangu? Pai bullet train ka danga senzüdaktsü asü masü? Süra, pai kechi inyak? Tazüngla inyak, kechiyong pai taila tenangzükbatem agi, ta Sidhu-isa metetdaktsü.
PM Modi-i ‘Make in India’ maparen inyakba aija “Japan nungi bullet train arur; France nungi Rafael jet arur; Sardar indang kürakyanglu ka China nungi aru; Kechisarena ajak bendang linüktem nungi arur süra, India-i kechi yanglur?” ta Sidhu-isa ashi.
“Rs 500 crore indang Rafael jet kechiba Rs 1,500 crore agi ali? Ali acre 1,250 tashi kechiba Ambani nem sen crore 400 yong agütsü, saka Ambani-ibo kasa aliji sen crore 4,000 yong yokdok” ta paisa shisem.
Züngsem 200 agi akümba Rajasthan Legislative Assembly election December 7 nü agitsü aser December 11 nü votes azüngtsü.