BJP-i menden 3-6, NDPP-i 8 aser NPF-i 30 dak tema nung takok angutsü

Dimapur, Tsüklai 9 (TYO): Taruba general election nung BJP-i menden 3 nungi 6 aser NDPP-i menden 8 tashi ka nung takok angutsü saka NPF-ibo menden 30 dak tema nung takok angutsü ta NPF lennir aser Nagaland Home Minister Kuzholuzo Nienu-i ashi.
“BJP candidate 19-i tenüng agüja lir aser parnok rongnung nisung 3 nungi 6 shi kati dang takok angutsü. Nationalist Democratic Progressive Party-ia menden 38 nungi tokteper aser parnokia menden 8 tashi nung takok angutsü akok” ta pai ashi.
Taruba sorkarijia NPF-isa akümtsü anungji nübortemi party den mepilatsü ayongzüker, ta Azo-isa metetdaktsü.
Dzulha yimtsüng nung election atema nüboyimba sentong ka nung Azo-i NPF party indang Manifesto indang jembidang, NPF-i sorkar ketdangsübaren nung temelenshi bener arutsü atema inyaktsü ta ashi.
Taruba sorkar nungbo Parliamentary Secretary aser Advisor mapatem malitsü saka NPF sorkari yimsüsür ajaki shilem agitsüsa ketdangsütsü. Linük Temzüng Arrla 191 kübok Office of Profit onük nung maibelentsüsa sorkari mapa inyaktsü, ta paisa shisem.
Nagaland state nung nüngtugu sorkar ka alidang Naga yimten latettsüla aser iba atema NPF sorkari tajungtiba agüja inyaktsü, ta Home Minister-isa ashi.
Taruba NPF sorkari sorkar ketdangsübaren merüktettsü aser ochimashi ken o ajak CBI ket nung agüja aibelenertem ozüng agi merenshitsü, ta paisa sangoktsü.
ayutsü, ozüng alema arurtem azüoktsü, lanur nem skills sayutsü, education & healthcare jenjang tajungba kümdaktsütsü aser agri o allied sector ajungkettsü onüktem dena lir ta Azo-isa ashiba olen ka Press Bureau, Naga People’s Front, Central Headquarters indang sangdong ka nung metetdaktsü.