BJP-i Mizoram assembly menden ajak nung tokteptsü: Amit Shah

Aizawl/Guwahati, Mongputeni (October) 17 (Agencies): Bharatiya Janata Party (BJP)-i November 28 nü Mizoram Assembly election nung menden 40 prongla nung tokteptsü.
Bodbarnü BJP national president Amit Shah-i iba osang ya Dengthuama Hall, Aizawl nung metetdaktsü.
Aizawl nung Mizoram Pradesh BJP maparen tenzükba sentong nung jembidang Amit Shah-i Mizoram nung Congress sorkari ochimashi inyaker ta tai tongloktsü.
“(Narendra) Modi’er sorkari sen crore aika agütsüba Lal Thanhawla-i aniba sorkari tim mesüi amshiogo” ta pai ashi.
“BJP-i shinga teyari magii election nung tokteptsü. Onoki MNF mesüra tanga regional party kecha dena tesentaktep mayutsü. Onoki Assembly menden 40 prongla nung tokteptsü” ta Amit Shah-isa shisem.
Mizoram nung taruba sorkarji BJP-i akümtsü aser Mizoram nung taruba Christmas ji BJP yimsüsüba kübok amungtsü, ta pai metetdaktsü.
Northeast nung Mizoram dak alaka state tenetprongla nung BJP lir aser taruba elections nung iba otsü melentsü. BJP-i Mizoram nung sorkar tasen ka akümtsü aser iba ajanga terenlok bener arutsü aser ochimashi agientsü, ta Amit Shah-isa ashi.
“Congress sorkari ochimashi mapa inyaker. Mizoram nung chief minister-i ajak agiba ajanga par Cabinet jashidaktsür. Par lennirtem ka khen ka ta party toktsür aoer” ta paisa shisem.
“PM Modi-i sensaketem ajungkettsü atema tenzüktsüba scheme aika Mizoram Chief Minister Lal Thanhawla-i sota lir, kechiyong iba tenüng tajungji Modi dangi aotsü ta pai tsübur” ta BJP national president-isa ashi.
“Lal Thanhawla’er NLUP-i ochimashi mapa inyakba atema ashishir aser iba jagi parnoki NEDP ta tenüng melenogo” ta Shah-isa shisem.
Bharatiya Janata Party (BJP) national president Amit Shah-i yashi Guwahati nung Kamakhya Temple semdangba sülen Mizoram-i apusoa ao.
BJP national president indang Twitter handle nung “Tanü Durga Ashtami anogo nung Guwahati nung aliba Maa Kamakhya devi shaktipeeth nung sarasademogo” ta metetdaktsü.
BJP national president-i Dr Buddha Dhan Chakma BJP nung anioktsü. Chakma ya Congress MLA ka liasü aser pa Mongulbarnü State Assembly nungi anen.
Mizoram atema BJP election in charge aser Assam Finance Minister Himanta Biswa Sarma den senden ka amendang Chakma-i MLA menden toktsü.
Aizawl nung BJP senden nung Nagaland Deputy Chief Minister Y Patton aser BJP-i sorkar yimsü asüba Northeast state tem nungi lennirtem aden.
Northeast nung Congress sorkar aliba state ji Mizoram dang lir.
November 28 nü züngsem 40 agi akümba Mizoram Legislative Assembly election nung BJP-i takok angutsü meranger.