BJP-i MLA Sengar nem teyari agütsür: Congress, BSP & SP

Lucknow, Chiteni/July 30 (Agencies): Opposition Congress, BSP aser SP-i Mongolbarnü BJP pur aija ashiba agi, aiür chanu ka tashiyim agi raksatsba nung aija alisang, party MLA Kuldeep Singh Sengar nem parnoki teyari agütsür.
Arishi küm 19 tain aiür chanula den la okatsür aser lar kinungertem gari ka nung mener oya aliba mapang tata gari kati aru atsük aser iba lendong nung nisung ana asüba den aiür chanula aser la okatsür kanga mejungi yiru. Iba tatalokba sülen anogo ka lir BJP MLA Sengar aser pa den tangar teku Hombarnü nisung tepsetba ken o nung aija puogo.
Unnao nung tashiyim agi raksatsülar kinungertemi, Honibarnü gari tsükokba lendong ya asaa inyakba maparen ka lir ta aija ashishia liasü.
Par kinungertemi mozüki kima longkak aita amen, kong la temang anepalua liasü aser la tebutanobo Mahesh Singh, kinungtsü den asüpila sentong nung adentsü atema tepuokdak nungi chioktsü khanga liasü.
BSP tir Mayawati-i tweet ka ajanga ashiba agi, “BJP MP Sakshi Maharaj aser aija alisang na tepuokdak ajurutepba tetezü pa nem BJP puri maneni teyari agütsüdar. Supreme Court-i iba ya jangja alitsüla.”
Legislature Party lenir Ajay Kumar Lallu-i anir Congress züngsemtemi BJP MLA ya party nungi mintoktsü asoshi khanga longkak ait.
Samajwadi Party tir Akhilesh Yadav, shibai aiür chanular kinungertem den mozükidang ajurutepogo, pai iba tatalokba ajak sorkar dak tongloktsü.
“State sorkari iba aiür chanula nem ya ochi obendang agütsütettsü na. Lar kinungertemi kechi tai inyak. Yirur alir ana dak langka danga atalokra iba khuret shibai abentsü,” ta Yadav-i ashi.
KGMU Trauma Centre nung doctor temi ashiba agi, yirua alir anaprongla ventilator nung lir aser tena temang maneni asadangdar.
Uttar Pradesh sorkari lenmang nung lendong atalokba CBI nem bushitsüngdaktsütsü asoshi benokdangogo