BJP-i MP angh dang Assembly special session akatsü asüngdang

Bhopal, Monupii/May 20 (Agencies): BJP-i Madhya Pradesh Angh Anandiben Patel dang state assembly special session ka akatsü asoshi asüngdangogo. Parnoki ashiba agi, Kamal Nath-i aniba Congress sorkar majority masü.
Lok Sabha exit polls nung Congress-i election makoktsü ama sayuba sülen anogo ka lir tang iba jenjang ya agiogo.
Assembly Gopal Bhargava nung opposition lenir-i, “onoki aluyimer tem dang loan tai adoktsüba amala onük aser sorkar tashi tendangtsü asoshi sensak semner,” ta PTI dang ashi.
“Exit pool ajanga Congress pur tamakok anguba sayuogo aser kechi südir süaka sorkar ya minority lir. Narendra Modi Ato Kilonser shimtsü atema election agiogo saka iba election ajanga Kamal Nath-i aniba Congress sorkari ita trok tsüngda inyakba indang sayur,” ta Bhargava-i ashi.
“Nenoki tensa nenoksasa asadangtettsü. Parnok SP MLA ka, BSP MLA ka aser Independent MLA pezüi teyari agütsür. Parnok tsüngda obang mapu adoka lir,” ta paisa ashi.
Madhya Pradesh Congress general secretary in-charge, Deepak Babariya-i ashiba agi, “Madhya Pradesh nung BJP-i ochimashi inyakyim ajanga Congress sorkar adogsatsütsü meranger. Ita ishika tejakdang assembly election nung Madhya Pradesh nung aliba nüburtemi Congress pusemogo aser tang parnoki iba amala maparen inyakba ya nüburtemi tai madoktsü,” ta pai PTI dang ashi.
Congress Otongdar, Bhupendra Gupta-i, “Lok Sabha results dak ajemdaker state Assembly indang jembitsü kecha nüngdak mali. State nung tang aritepa jembishinütsüsa mepetmesü kecha adoka mali. Maneni speaker election mapang onoki onok nübu timba aliba sayuogo, anungji soarkar ya nübu agi ajema mali,” ta ashi.
2018 küm December ita Congress puri 2014 general elections küm sülen mezüngbuba kangajunga mapa inyak. Parnoki Rajasthan, Madhya Pradesh aser Chhattisgarh nung BJP atsüngdok. Congress-i Chhattisgarh nung election ajemshia akok aser Rajasthan nung tera agi majority atong aser Madhya Pradesh nung tera agi matong.
Kamal Nath-i aniba sorkar kübok assembly züngsem 230 nungi 114 lir aser parnok Independent MLA 4, BSP MLA ana aser Samajwadi Party MLA kati puasemer. BJP pur MLA 109 dang lir.
Tawa Mayawati-i aniba BSP party-i Congress sorkar pu masemtsü amokmeren. Guna Lok Sabha menden atema lar candidate Congress nung dena election nung metokteptsü atema telemtetba agiba sülen parnoki state nung sorkar amokmerena liasü.
“Mapang tetemsü nung Congress puri iba taa aotsü. Iba amala inyakyim ajanga onoki Atal Bihari Vajpayee-i aniba sorkar atsüzük,” ta lai ashi.