BJP-i Naga yimtenren latettsü mapangji metetdaktsütsüla: Imkong L Imchen

Kohima, Aenjeti (January) 24 (TYO): Tanü Nagaland Health & Family Welfare Minister, Imkong L Imchen-i BJP dang Naga nunger yimtenren onük latettsü atema mapangji tejangja metetdaktsütsüla, ta ashi.
Aenjeti (January) 22 nü Member of Parliament, BJP general secretary aser Northeast nung RSS in-charge, Ram Madav-i, ‘Naga yimtenren latettsü atema mapang anasabai arutsü asoshi election agitsüla’ ta jembiba o dak sendakba nung Minister, Imkong-i, ‘mapang anasabai’ ji kechi ? ta asüngdang.
Tanü Kohima nung osangbenertem senden ka nung jembidang Minister-i, NSCN(IM) den Framework Agreement sign asüba sülen joko küm asem jungnüa arur, aser ceasefire tezüngzüktep agira küm 20 jungogo, ta ashi.
“Naga yimtenren onük latettsü atema Naga nunger atema küm 20 ji mapang talangka lir. Talisa 2015 küm Luroi (August) 3 nü Framework Agreement agiba sülen Naga nungeri Ato kilonser, Narendra Modi lenisüba tajung nung teimla akar,” ta paisa ashi.
Modi-i NSCN(IM) aser India sorkar tsüngda yimtenren ken o tiyongi ia jembitsü atema R N Ravi shim, aser ibaji Prime Minister’s Office kübok lir; tamalenbo ibaji Union Home Ministry kübok liasü, ta shia Minister-i, “Ibaji Naga yimtenren onük tekaratiba nung latettsü atema nendaka inyakba temaitsü ka lir ta Naga nungeri rateta agi,” ta metetdaktsü.
“NSCN(IM) den Ceasefire Agreement agiba sülen Naga nungeri state general election pezüben agiogo, ta Ram Madhav-i junga meteta lir, ajisüaka tang tashi Madav-i state Assembly election magira Naga yimtenren onük latettsüji ‘mapang anasa mali’ ta bilemer,” ta Minister-i ashi.
Paisa, Madav-i Naga nunger den iba telatetba jembir süra, ibaji Naga nungeri junga magitsü, ta ashi. Ajisüaka paisa, “Onok nem yimtenren latettsü sempet agutsütsü atema Madav-i iba ya (election agitsü) lateter süra, yimtenren latettsü atema pai mapang shidakbaji metetdaktsü nung ajungtsü,” ta ashi.
Minister-isa, BJP party nung bangdak lenirtemi Madav-i jembiba oji BJP indang official o ka lir, ta shira kanga ajungtsü, ta ashi.
“BJP-i iba o ya tekaraba nung jangjashitsütsüla ta ni ashir, kechiyong Naga nungeri ibaji jangjatsü temsüa lir,” ta pai ashi.
Minister-isa Indian National Congress aija, Naga nunger yimtenren onük mapang talangka melateti alibaji parnoki takok anguba otsü nung lir ta bilemer, ibayongji parnoki Naga yimtenren onük küm 65 tashi melatet, ajisüaka Naga nungeribo mapang talanga yimtenren melatetbaji takok otsü ka ta magizüker, ta aitsü.
Iba dak sendakba nung pai, Nagaland nung BJP-i parnok tashi aser jenjangji tali asadangteter, ajisüaka election agira nüburtemi vote agütsüba ajanga kuli agütsütsü, ta ashi.
“BJP asalentong aser NPF party aser tesendaktep teloktem den parnok tasaji onoki meteta lir, anungji mapang tetemsü nung onoki telangzüba shidak agütsütsü,” ta pai ashi.
Naga Hoho aser tanga lokti tentettemi parnoki state nung election magidaktsütsü ta jembiba dak sendakba nung Minister-i, “Parnoki election nung shilem magitsü, asü parnoki election agitsü memelatsü tebilemba ali’ar ni memetet; iba o anaji khenyongi balala,” ta ashi.
“NPF-i elections sota atatsü mesüra atsülangdaktsüner, koba ajanga Naga linük nung tensa tajung ka yanglutsü, koba ajanga yimtenren latettsü atema lenmang lapoktsütsü,” ta paisa ashi.
“Onoki election maginer, NPF atema ibaji tejangja ajisüaka onoki Naga nunger akhümket alitsü aser sensotem nüma tangteta alitsüsa yimtenren telatetba ka aginer,” ta paisa metetdaktsü.
“Onoki election nung takok angutsü ta meteta lir, ajisüaka Naga yimtenren latettsü atema maongka agütsütsü onok renema lir,” ta paisa shisem.