BJP-i Nagaland nung ‘Saaf Niyat aur Sahi Vikas’ tenzük

Kohima, Chiateni/July 05 (TYO): Central BJP tetuyuba nung ajemdaker tanü BJP Nagaland unit Tir, Temjen Imna Along aser Secretary Organising, Ananta Mishra na leniba nung Bharatiya Janata Party (BJP) Nagaland Unit-i state nung “Saaf Niyat aur Sahi Vikas” programme tenzükogo, ta tanü Media Cell BJP Nagaland-i sangdong ka nung metetdaktsü.
Tesüiba küm pezü tsüngda Narendra Modi’er sorkari inyaktetba mapatem aser NDA sorkar yimsüsüba mapang scheme balala indang metetdaktsüba kaket tapak 40 nung shia lir, aser iba kaketji nüngtugu nisungtem aser state nung lokti tentet balala nem lema agutsütsü.
Tanü Nagaland nung iba sentong tenzükba mapang Party Tir aser Secretary Organization nati retired Commissioner & Secretary, T.C Sangtam ajurua liasü aser Modi leniba nung NDA sorkar kübok inyaktetba mapatem metetdakja liasü.
Iba denji kasa taruba anogotem nung State BJP, District aser Mandal officials-ia peipei tesem nung iba sentong agitsü.
National BJP Tir, Amit Shah nungi anguba shidi ka nung pai, “Mezüngbuba nung, asenoki lokti nung ajak libaliro jenjang ajungkettsütsü atema inyaktsü, talisa sensakertem, nüngdakbapurtem, rongsenkettsüng jenjang mejungi alirtem, tribals, lanurtem, aluyimertem aser tetsürtem atema inyaktsü, ibaji ajanga nisung ajaki Bharat senso ka ta nüma tangtettsü. Tanabuba nung, onoki Bharat ya tashitait aser terenlok aliba linük ka kümdaktsüner, koba ajanga aliba nem yimsüsüba jenjang agutsütettsü,” ta shia lir.
Küm pezü tejaklen Narendra Modi lennisüba kübok mangdang yur NDA sorkari lenla ajak nung linük renlokdaktsütsü atema tayongzükba agizük aser tashitait aser azükaru linük ka kümdaktsütsü atema inyak tenzük, ta shidi nungjisa shia lir.
State BJP Tir, Temjen Imna Along-ia State BJP tenüng nung Modi sorkari linük nung aluyimertem atema bilemja aluyimba sector nung 2018-19 küm atema paddy MSP (Minimum support price) quintal nung sen 200/- tutsüba atema pelaba lemsatep, ta Media Cell BJP Nagaland sangdong ajangasa metetdaktsü.