BJP-i nashi külemer saka mekümzüker: Sheila Dikshit

Lucknow, August 07 (Agencies): Taoba ita Gujarat, Una nung Dalit nunger pezü dak azükba atema yashi Ato kilonser, Narendra Modi-i nashi kümzükertem aitsüba sülen tanü Congress lenir aser Uttar Pradesh chief minister candidate, Sheila Dikshit-i, Bharatiya Janata Party (BJP)-i nashi külemer, ajisüaka nashi kümzüka ayutsü atemabo mebilemer, ta aitsü.
Osangbenertem den jembidang Delhi nung asembenren tashi Chief minister inyakla, Sheila-i, “Nashi kümzüka ayutsüji asen khuret lir. Uttar Pradesh state nung aliba gari lenmangtem nung nashi jenti lir. Nashi kümzüka alitsü atema nashi ki alitsüla. BJP-i nashi külemer saka parnok (nashi) kümzüka mayur,” ta ashi.
Yashi Modi-i, “Nashi kümzüka ayuba tenüng nung dokan lapoktem dang ni kanga mepelar. Nashi kümzükertem jenti lir. Parnoki ozüng alema inyakba nembangtsü atema nashi kümzüker. Nashi timbaka plastic achiba ajanga asür. Nashi kümzükertem jagi nüburtem dang lenmang nung plastics meindoktsü ajungshitsüla,” ta jembia liasü.
Sheila-isa, Ato kilonseri bendang linüktem sema senzüba ajanga linük tajangzük mangur, ta aitsü.
Unnao nung Congress Seva Dal nung inyakertem den jembidang lai, “Mapang timbaka asen Ato kilonser bendang linüktem nung dang alir aser osang jenti yanglur. Ajisüaka itemji ajanga linük nem kecha lenmang nunga tajangzük magütsür. Pai election mapang nung aika nangzükogo, saka itemji mataloktsü,” ta ashi.