BJP-i NE nung tribal pur atema inyaktsü

Dimapur, June 24 (TYO) : Assam nung chief minister Sarbananda Sonowal-i aniba BJP sorkar ajanga Assam aser Northeast nung tribal teloktem indang khurettem asoshi inyaktsü tamang akar, ta BJP ST Morcha (North East) Co-ordination Committee-i metetdaktsü.
Assam yimten yimsüsüba nung tang mezüng atema tribal nisung ka chief minister inyaktsü shim aser Assam ya North East Region nung state tulutiba lir, ta co-ordination committee-isa ashi.
Hokolbar nikongtsütsü osangbener senden ka nung jembidang, BJP ST Morcha (North East) Co-ordination Committee züngsemtemi iba osang metetdakja liasü.
Küm aika Assam aser tanüngba North East state tem nung tribal nisungtem rongsenren aser tanga terenlok mapatem tangutsü tim mongui arur, ta National vice president, BJP ST Morcha, in-charge North East, Johnny Rengma-i ashi.
“BJP ST Morcha (North East) Co-ordination Committee-i Assam nung tribal nisungtem dang BJP-i tribal telok balala ajak longjemdaktsütsü nangzüker” ta Johnny-isa shisem.
Senden nung 18 Howraghat A/C (Karbi Anglong district) nungi BJP MLA, Joyram Engleng-ia ashiba, Assam nung BJP-i aniba sorkar tasenba ajanga Karbi Anglong nung tribal telok balala tsüngda mepetmesü alibatem agientsü.
Joyram Engleng ya ST Morcha, Assam State unit nunga President lir aser pa ya taoba Congress lennir ka lir.
“Taoba mapang Congress sorkartemi telemsa yur yimsü asüba inyakyim ajanga kin o kin aser tribal teloktem tsüngda mangatettep adok” ta Joyram-isa shisem.
ST Morcha (NE)-isa Centre dang state asem atema Circle for Postal Services balaka lapoktsü atema temepishiba agütsüigo, ta paisa metetdaktsü.