BJP-i ni jembiba olen mashilen meyipzüker: Gogoi

Guwahati, November 29 (Agencies) : Assam Chief minister, Tarun Gogoi-i oshi nung ajemdaker inyaksangshir ta BJP-i aitsüba sülen Gogoi-i, pai Hindi oshi jembirtem indang olen jembibaji BJP-i mashileni rateta belenshir ta o meyiptsüogo.
Deobarnü Gogoi-i ashiba agi, union minister Venkaiah Naidu aser BJP national general secretary Ram Madhav nati pai Hindi oshi jembir indang jembiba olen mashileni meyipsar.
“Ni Hindi oshi jembir anema kodanga mejembi. Assam nung BJP unit nung Hindi oshi jembiba lennirtem timba lir aser iba jagi Hindi tiyongtsü ser tentetba telok ka kümogo ta dang ashi” ta Gogoi-i jangjashitsü.
Congress nung Hindi oshi jembiba lennirtemi tetuyuba magütsür saka BJP nungbo Hindi oshi jembirtemi state lennirtem nem tetuyuba agütsür, ta paisa shisem.
Taoba Mongulbarnü Gogoi-i BJP aija jembidang, linük nung Hindi oshi jembiba lennirtemi Assam amaktsü meranger, ta ashi.
Linük nung BJP lennirtemi Assam nung Hindi oshi jembidaktsütsü meranger aser iba ya Hindi oshi jembirtemi Assam amakba inyakyim lir, ta Gogoi-i aitsü.
Iba nung ajemdaker Honibarnü BJP-i Gogoi aitsü aser parnoki ashiba ashi, Assam nung 2016 assembly elections atongtsü lia Gogoi-i oshi nung ajemdaker telemsa adokdaktsütsü atema yimten mapa inyaker.
Deobarnü Gogoi-i ashiba agi, tesüiba küm 14 tashi par sorkari Assam nung Hindi oshi jembirtem taginüba kümzüka ayutsü atema mapa inyaka arur.
Paisa, Assam nung Hindi oshi jembirtem atema development council ka tentettsü ta nangzük.
“Ni küm aika yimten mpa inyaka arudang, Bihar aser UP atema AICC in-charge inyakogo. Ni Hindi oshi jembirtem densema nisung ajak atema inyaka arur” ta Gogoi-isa metetdaktsü.
“Narendra Modi’er sorkari tongtipang mapatem toktsür vote agütsürtem mesütsü atema ang mapa inyaker. BJP-i aniba sorkari Assam aser Northeast atema mebilemtsür. Parnoki special category status agien, North East Industrial & Investment Promotion Policy anentsü aser central funds ajema kümdaktsü” ta Assam chief minister-isa ashi.