BJP-i Nov. 8 nü demonetization anogomong amongtsü

New Delhi, October 26 (Agencies): BJP-i November 8, 2017 nü tang mezüngbuba demonetization anogomong ‘Anti black money day’ amongtsü, ta tanü Union Finance Minister, Arun Jaitley-i metetdaktsü.
Yaküm November 8 nü Centre sorkari sen 500 aser sen 1000 notes anenja liasü, aser ibaji market nung tamshidak sen shilem 86 liasü.
BJP-i aniba sorkaribo demonetization ya linük nung ochimashi sen anema lir ta sangdong, ajisüaka Congress-i aniba opposition-ibo demonetization ya tan putu nung ochimashi tulutiba lir, ta aitsür.
Ano külen opposition-i, November 8 nü parnoki ‘Black Day’ anogomong amongtsü aser linük tesem ajungalen longkak aita demonetisation ajanga linük rongsenkettsüng jenjang raksatsüba sangdongtsü, ta metetdaktsü.
Osangbenertem den jembidang Rajya Sabha nung opposition lenir, Ghulam Nabi Azad-i, “November 8 nü sangdongba tu tan putu nung ochimashi tulutiba liasü, ibayongji onoki iba anogo ya ‘Black Day’ ta sangdonga amongtsü,” ta metetdaktsü.
“Iba ya tan putu nung ochimashi tulutiba liasü ta ashitsü akok. Sorkar telemtetba ajanga nüburtem timtemdaktsüba anema yimtenren party 18-i peipei state nung longkak aittsü lemtetogo. Sorkar mapatong ka ajanga nisung südaktsüba kecha linük nunga matalok,” ta Congress lenir Azad-isa ashi.
“November 8 nü tatalokba ya Modern India putiotsü nung ochimashi ama mamatoktettsü; onoki sorkar mapatong dak sendakba nung aika asüngdangogo saka sorkari telangzüba magütsü,” ta TMC lenir, Derek O’Brien-ia ashi.
Aam Aadmi Party-i, parnoki November 8 nü linük tesem ajungalen ‘tashioktsüba anogo’ ta ser longkak aita amongtsü, ta metetdaktsü. AAP lenir, Sanjay Singh-i, Modi-i aniba sorkar telemtetba balala ajanga linük rongsenkettsüng raksaogo, ta aitsü.