BJP-i Rajya Sabha nung CAB mebenoktet

Guwahati, February 13 (Agencies): February 13, 2019 nü Rajya Sabha nung Citizenship (Amendment) Bill mebenoktetba ajanga Bharatiya Janata Party (BJP)-i tetsükdaktsü ka ajuruogo.
Parliament nung Budget session tatembangba anogo nung iba Bill Rajya Sabha nung mebenokteti tembangogo.
Tanü Rajya Sabha Chairman aser Vice President M Venkaiah Naidu-i senden tembangtsü. National Democratic Alliance (NDA sorkari June 2014 nungi tenzüka yimsü süa arudang Rajya Sabha session 18 tashi liogo.
Yimya agi Rajya Sabha nung agizükba Bill ka Lok Sabha nung magizükteti tembang yonga iba Bill ji magiener. Saka Lok Sabha nung agizükba Bill ka Rajya Sabha nung magizükteti session tembangra, iba Bill jibo agienadoker.
Citizenship Bill ya Lok Sabha nung January 8, 2019 nü agizüka liasü.
Parnok den asüngdangya mesüi sorkari February 13, 2019 nü Rajya Sabha nung Citizenship Bill benoktsü ta ‘list’ nung enoksemba atema opposition party temi ashishitep. Tanü Rajya Sabha nung CAB benoka magizükteti tembangerji, iba Bill ano tanaben taruba Lok Sabha nung benoka agizük nung dang Rajya Sabha dangi abentsü.
Centre nung BJP-i aniba sorkari CAB ya tekaratiba nung agizüktsü atema meranga inyakyonga aru.
Rajya Sabha nung CAB mebenoktetba ya Northeast India kübok state 7 nung lisopurtemi atema takok tulu ka anguba ama züngshir.
Lok Sabha nung CAB agizükba sülen nung tesüiba ita ana tashi North East nung lisopurtem telok balalai lungkak aityonga aru aser Centre sorkar dang iba Bill agientsü atema takhangba agütsü.
CAB anema Northeast Bandh ta ser tang mezüng atema mokdang ayongzüka amung aser iba mapang civil societies dang masü saka NE yimten yimsüsürtemia shilem agia CAB anema ola adok.