BJP-i regional party tem matsüngdoktet: Shiv Sena

Mumbai, May 20 (Agencies): Yashi state pongu nung assembly election osang sangdongba sülen Assam nung BJP-i takok anguba atema party pur pelatepba mapang ka nung tanü Shiv Sena-i, BJP-i Assam nung takok nguaka Modi’er mopungsem ajanga West Bengal aser Tamil Nadu na nungbo mapa meinyak, ta ashi.

“Onoki sasaseta ya ashitsüsa akumer, Modi’er mopungsem ajanga kecha meinyak aser BJP-i regional party tem matsüngdokteti West Bengal aser Tamil Nadu na nung takok angu,” ta Shiv Sena indang osangkaket ‘Saamana’ yimobilem ajanga ashi.

Shiv Sena-isa, “BJP-i Congress atsüngdoka Assam nung takok angu. Ajisüaka parnoki West Bengal nung Mamata Banerjee, Tamil Nadu nung Jayalalithaa aser Kerala nung Left party matsüngdoktet. Iba tetezü regional party tem junga amenoka aliba tesemtem nung BJP-i takok mangu,” ta ashi.

“Congress party mopung nung samaogo ta nisungtemi jembir. Ajisüaka Assam ji tezülen toktsüra, BJP dak kechi atalok (?)” ta Sena-i asüngdang.

“Kerala nung Congress aser Left party nati melentepa takok angur. Tang Left-i takok nguogo. Yangi BJP-i ‘Acche din’ nung anisüngzük angutsüba dang, kechiyong parnoki account dang lapoktet,” ta Shiv Sena-i ashi.

BJP-i Northeast state tem nung party tera ayangtsü merangba mapang ka nung Assam nung tang mezüng BJP-i Congress madak takok ngua putisütsü otsü ka yanglu.

Kerala nunga Left Front-i Congress madak takok nguogo. Tamil Nadu aser West Bengal na nung AIADMK aser Trinamool Congress nati maneni takok nguogo. Puducherry nungbo Congress-DMK teloktepi sorkar akumtsü.