BJP-i RSS indang yimtenren kongsang ama inyaker: Yechury

New Delhi, September 20 (Agencies): RSS-BJP lenisüba nung India ya kijai tashi amshiba (fascism) tsütsüleni odar, ta shia tanü CPI(M) general secretary, Sitaram Yechury-i, BJP-i RSS indang yimtenren kongsang ka ama inyaker, ta aitsü.
Osangbenertem den jembidang Yechury-i, “BJP-i RSS indang kongsang ka ama inyaker. RSS tangatetbaji kijai tashi amshiba lir, aser ibaji ajanga India nunger secular democratic Constitutional republic ya ‘Hindu Rashtra’ agi melentsü meranger. Onoki ibaji anema nokdaker, aser onoki maneni anema nokdaktsü,” ta ashi.
“Anungji, iba ya fascist linük ka masü, saka inyakyimji fascism tsütsüleni odar. Parnoki ibaji inyakner. Ibaji inyaktsü onoki memelatsü,” ta paisa ashi.
Tamalen English osangkaket ka nung Prakash Karat-i, tang India nung fascist yimsüsüba amenoktsüsa tensa ka nung mali, ta ashi. Paisa, Centre nung Narendra Modi’er sorkari tashi alia amshir saka ibaji fascism masü, ta ashi.
CPI(M) anogo asemnü Central Committee (CC) senden sülen osangbenertem den jembidang Yechury-i, fascism tetezü kiralongrar kijai tashi amshiba agi Parliamentary democracy melenzükba lir, iba ama ya India nung kodanga matalokdang, ta ashi.
CC-i iba onük nung o lemteper ma ? ta asüngdangba langzüdang Yechury-i, “Ni ozü party tangatetba shiogo. Ajaki (CC züngsemtem densema) party tangatetba meteta lir,” ta ashi.
CPI(M)-i Congress den longjemtsü asü ta asüngdangba langzüdang Yechury-i, iba ya party nungi party tangatetba ka masü aser iba ya election dak sentaka mali, ta ashi.
CC senden nung jembiba tanga onüktem rongnung Modi-i tang telidak Non-Aligned Movement Summit nung madenba onüka süoka jembi, ta CPI(M) lenirisa ashi.
Committee-isa Centre nung party tashi itshitsü aser party tashi aittsü atema PB/CC inyakyim tashi itshitsü indang jembi, ta paisa ashi.
Taküm November 7 nü nungi tenzüka centenary mapang party-i October Revolution Centenary amongtsü, ta paisa shisem.