BJP-i RSS yimtenren lenir ka India Tir aginer

New Delhi, June 16 (Agencies): 2014 küm Lok Sabha election nung BJP-i takok tulu anguba sülen BJP-i 2017 küm RSS nungi yimtenren lenir ka India Tir shimba ajanga puti otsü tasen ka yanglutsü nükjidong lir.
Party-i India Tir election nung rangloker maparen tenzükogo, kechiyong linük nung temaba menden atema party nungi tetemjen nübo lir, ta Brihostibarnü BJP telung osang ka ajanga metetdaktsü.
“Onoki state balala sasep nung ongko inyakogo. (Tir election nung) NDA-i vote tali 22,078 agi takok angutsü ta onoki inyaktetogo,” ta kasa osang ajanga ashi.
Tir election nung vote tali 22,078 ji ishika dang, kechiyong ibaji vote ajunga, 10,98,882 nungi shilem 2% dang lir. Ajisüaka parnoki item ongko indang osang tejangjabo memetetdaktsü.Iba osang ya ajanga, BJP-i tang teinyaktak Tir, Pranab Mukherjee tanabenbuba kümsük inyaktsü memelungtsü, ta kuli sayur.
Linük nung temaba menden nung RSS nungi yimtenren lenir ka shimtsüji tang ya Ato kilonser, Narendra Modi aser BJP Tir, Amit Shah na atema maongka tajung ka lir.
Taoba mapang Atal Bihari Vajpayee lenisüba kübok NDA sorkar tashi nung aliba mapang Tir atema party züngsem peria maliasü. Opposition nungi meshimdaktsütsü atema party nung madenba tenüng, APJ Abdul Kalam benokba nung parnopki aiaura akatsüsa akum.
Ajisüaka tangbo Lok Sabha nung züngsem peria aliba den külemi Maharashtra, Haryana, Jharkhand, J&K aser Assam nung takok anguba ajanga BJP temelung lemtettsüsa kumogo.
Lok Sabha züngsem 282 dak alia linük nung BJP MLA 1,126 lir. Congress den medemdangra Congress nungibo Lok Sabha nung MP 44 dang lir aser MLA 900 dang tajemba lir.
Tir election ya sangküm June-July ita nung agitsüa akok. Iba election ya Uttar Pradesh nung assembly elections tembangli agitsü.
Tang UP nung BJP jenjang junga mali ajisüaka state election aika nung takok nguyonga aruba sülen parnoki UP nunga takok angutsü nükjidong yur inyakdar.
“Tang UP assembly nung ozü MLA aliba dang nungi onoki MLA timba angutsü, ibaji nungji ajaki ai-aura akatsü,” ta party osang ajanga ashi.
India Tir election nung electoral college nung MLA 4,896 lir: Lok Sabha aser Rajya Sabha züngsem 776 aser MLA 4,120 lir.