BJP-i Sonia Gandhi aitsüba ajanga RS nung rongrong adok

New Delhi, April 27 (Agencies): Bodhbarnü BJP lenir, Subramanian Swamy-i AgustaWestland helicopter süpokrem ken o nung Congress Party Tir, Sonia Gandhi tenüng tetshiba sülen Rajya Sabha nung opposition aser treasury bench na tsüngda o langzütepa rongrong tulu adoka liasü.

Senden nung Congress Party züngsem kar kanga jashia treasury bench tsütsüleni aoba ajanga lendong tulu adoktsü südi ta bilema liasü, ajisüaka marshall anati parnok tiyongtsü ia nokdanga liasü.

Congress züngsemtemi Swamy dang “CIA agent” ta aja aser senden aiben thinena liasü.

Ajisüaka Rajya Sabha Mendenbuba, Hamid Ansari-i lungkak aiter züngsemtem dang Question Hour agitsü benok.

Sorkari Rajya Sabha züngsem atema shimsang, BJP lenir Swamy Bodhbarnü tenangzükba agia liasü, aser tanep senden tenzükli pai AgustaWestland chopper ken o süoka liasü.

Sen crore 3600 agi VVIP helicopter alitsü bangjemba ken o pai süoka liasü.

Iba ken o nung Swamy-i Sonia Gandhi tenüng tetshili yongi Congress züngsemtemi jashia sabangleni ao, aser parnok rongnung karbo treasury benches anasai ao. Iba mapang nung treasury benches züngsemtema nokdaka o langtep, ajisüaka marshall anati ibaji nokdanga liasü.

Iba tensa tamajungba makümdang ta ser ibaji nokdangtsü atema Deputy Chairman, P J Kurien-i senden minute 10 thinena liasü.

Iba sülen senden tanaben tenzükdang Kurien-i Swamy dang, züngsem ka shibai arua la/pa/la sasa pei temeten o mejembitettsü (kechiyong Sonia Lok Sabha züngsem lir), iba züngsem tenüngji metetshitsüla, ta ashi.

“Ni na maitsür, kechiyong iba ya senden nung na atemabo tang mezüngbuba jembir lir. Ajisüaka tenüngji medensemer,” ta Kurien-i Swamy dang ashi.

Ibaji ajanga-a Congress züngsemtem melung mesüi Swamy anema yimyim ayimba manenba ajanga Deputy Chairman-i ano senden thinena liasü.

Ano maneni senden tenzükshidang Congress züngsemtemi nokdaker Swamy dak tuyua, “CIA agent yangi mena lir,” ta aitsü.

Opposition lenir Ghulam Nabi Azad-i, Swamy-i pai jembiba o tanaben meyipa magi tashi senden nung o jembitsü pa nem temelaba magütsütsü, ta ashi.