BJP-i ST jenjang agütsü ta ashibaji tebang o dang lir:Gogoi

Guwahati, March 2 (Agencies) : Assam Chief Minister Tarun Gogoi-i, BJP-i aniba NDA sorkari state nung kin trok nem ST jenjang agütsütsü ta ashibaji tebang o dang ashi mapa makümtsü kechiba süra iba tenangzükba ataloktsütsü asoshi parnoki mera kecha magir, ta ashi.
Centre-i yashi, Hombarnü, ST jenjang agütsütsü mapa dak sentakba nung tentet ka tentettsü sangdongbaji parnok asoshi mapanga alirba dang lir aser BJP-i ibaji state Assembly Election agiba sülenbo amatoktsü, ta pai ashi.
Osangbenertem den jembiba mapang Gogoi-i ashba agi, “BJP sorkari item kin trok lenirtem dang parnoki akhangba ataloktsüogo aser Ato Kilonseri sign asütsü dang anünga lir.”
“Aji oda süaka iba kasa sorkar jagi tangbo iba dak sentakba mapa asoshi tentet ka ajanga nüngdakba osang ajak bendena ita asem tsüngda nung tongtsüba sülen ang inyakyim tenzüka aotsü ashir,” ta ashidang Gogoi-isa-i, ya Assam nunger ashioktsütsü sentong, ta shisem.
Pai, “Ni yimsüsübaren nung ajemoker iba amai khen tanga majurudang,” ta ashi.
State sorkaribo item kin trok nem ST jenjang agütsütsü temelaba aiben agütsüogo ajisüaka Centre-i iba dak sentakba nung mapa kecha meinyak,” ta ashi.
Paisa, “Centre-i iba mapa ya shishia mebilemer. Parnok nüburtem ashiokja election nung takok angutsü meranger ajisüaka Assam nüburtem iba tsütsü kanga shisa taka lir,” ta ashi.
Tang ST jenjang meshir kin trokji Moran, Mottock, Tai Ahom, Koch Rajbonshi, Tea Tribes aser Chutia kintem lir.