BJP-i state 5 nung party Tirtem shimogo

New Delhi/Bengularu, April 08 (Agencies): Hokolbarnü New Delhi nung BJP-i state pongu nung party Tirtem tenüng sangdongogo, aser item state rongnung nütsüng timtiba aliba state aser sangküm assembly election agitsü aliba state, Uttar Pradesh densema lir.
Phoolpur nungi MP, Keshav Prasad Maurya-i Uttar Pradesh nung party anitsü aser Karnataka nung taoba mapang chief minsiter, BS Yeddyurappa party Tir asütsü.
Assembly election agitsü aliba state, Punjab nung Union minister of state aser Lok Sabha MP, Vijay Sampla Tir asütsü, Telangana nung BJP state unit Tir ji Dr K Laxman aser Manipur nung Tapir Gao party Tir asütsü shimogo.
Hokolbarnü New Delhi nung aliba party headquarters nung Party national general secretary, Arun Singh state pongu nung Tir tasentem tenüng sangdonga liasü.
2011 küm ochimashi ken o nung anogo 21 tepoukdak alisang aser BJP lenir, BS Yeddyurappa Karnataka state unit nung Tir tasenba shimogo, aser tang agi pa iba menden nung pezübenbuba shimmer.
Ochimashi ken o nung tai tongloktsüba sülen tenüng menük bener arutsüba ajanga party purtemi BS Yeddyurappa dang chief minister menden nungi alutsü tuyuba sülen pai 2012 küm BJP toktsü aser party tasen ka tenteta liasü.
Ajisüaka 2014 Lok Sabha election atema nüboyimba sentong lenitsü atema 2013 küm Narendra Modi shimba sülen pai tanaben BJP nung aden.