BJP-i takartem atema inyaktsür: Rahul

New Delhi, Mongputeni/October 06 (Agencies): Tanü Congress Party tongti, Rahul Gandhi-i, Central sorkari takar nisung kar atema dang inyaktsür saka aluyimertem den tangartembo sendoker, ta aitsü.
Paisa Rafale fighter jet aliba ken o nung ajemdaker Ato kilonser, Narendra Modi aitsü.
Gandhi-i, nüburtemi Madhya Pradesh, Chhattisgarh aser Rajashthan state tem nung party nem takok ngudaktsüra party-i tribal rights bill mapa küma inyaktsü, ta nangzük.
“Nenoki takartem yarinüra yamaji inyakang, ajisüaka nenoki aluyimertem aser sensakertem yarinüra yamaji inyakang. Takartem dang sentsüh 3 lakh crore toktetra kechiba aluyimertem aser sensakertem dangbo yamaji meinyakteter?” ta pai asüngdang.
Tribal tentet, Adivasi Ekta Parishad-i ayongzükba sentong nung jembidang pai, “Tribal bill ya sempet ka masü saka tribal nisungtem indang temeden ka lir. Tribal nisungtem nem parnok li, tzü aser arem atema temeden agütsütsüla,” ta ashi.
Scheduled Tribes and other Traditional Forest Dwellers (Recognition of Forest Rights) Act, 2006 ya Centre nung Congress-i aniba UPA sorkar aliba mapang nung agizüka liasü.
Land Acquisition Bill nung ozüng kar yanglushiba aser Panchayati Raj institutions tashi meiti kümdaktsüba atema Rahul-i Modi aitsü.
Congress lenirisa, 2016 küm demonetisation inyakyim ajanga ochimashi sen ajak meshiteta akum, shinga tepoukdaki meyok, aser ibaji BJP-i nangzükba den meputep. Shinga indang bank account nunga sen lakh 15 magutsü,” ta ashi.