BJP-i tamangba lokti tsüngda rara adokdaktsütsü meranger: Gogoi

Guwahati, February 01 (Agencies): Hombarnü Assam Chief Minister, Tarun Gogoi-i, assembly election agitsü mapang ana nung lia opposition BJP aser tanga party kari state nung tamangba lokti tsüngda rara adokdaktsütsü meranger, ta jembiogo.
Guwahati nung February ita assembly senden tembangba sülen osangbenertem den jembidang Gogoi-i, “State nung election agitsü lia BJP aser tanga party kari tamangba lokti tsüngda rara adokdaktsütsü merangba osang lir. Sorkar kanga junga renema lir aser iba onokio iba ama rara madokdaktsütsü,” ta ashi.
“BJP-i ano Ram Janambhumi onük bener arur. Election atema parnok tongtibangtiba onükji lokti tsüngda rara adokdaktsütsü lir,” ta pai ashi.
Tawa Assam aser Arunachal Pradesh Angh temi “RSS tangatetba benoker aser RSS pracharaks ama benshir,” ta paisa ashi.
Taruba assembly election dak sentakba nung Gogoi-i, “BJP-i parnoki menden 126 nungi menden 85 angutsü ta jembir. Süra kechiba parnoki teloktep party atema BPF, AGP aser tanga party tilatem arishir (?) Iba election nung takok angutsü ta parnoksasa mulung malemer,” ta ashi.