BJP-i tanga party tem nungi maneni nisung anioktsü: Himanta Sarma

Mariani MLA Rupjyoti Kurmi-i nübortem asoshi inyaker

Guwahati, June 21, 2021 (Agencies): Hombarnü Assam Chief Minister Himanta Biswa Sarma-i taoba Congress MLA Rupjyoti Kurmi BJP nung pelaa agizükba mapang “BJP-i maneni tanga political party tem nungi züngsemtem aniokba mapa inyaktsü” ta ashi.
“Prime Minister Narendra Modi indang tangatetba aser linük renloktsü atema meranga inyakba ajnaga ajungmesoa political lennir aser züngsemtemi BJP nung adener. Assam nung nübortem aser telok ajaki künü anogo BJP den sendakteptsü aser linük renlokdaktsüba nung shilem agitsü imlar” ta Sarma-i ashi.
2014 nungi tanga party tem nungi BJP nung nisung züngsemba mapa tenzüka liasü aser taküm assembly election magidang tashi lennir aika denogo. Ano nisung aikati election agiba sülen BJP nung adentsü jangraba shiogo, ta Sarma-isa shisem.
Rupjyoti Kurmi ya lanur lennir ka lir aser pai süngolu ayimba kintem atema dang masü saka state nung aliba nübortem taginüba aser alizüngtem atema inyaker, ta pai ashi.
“Assam-Nagaland arrtsü tebilemtsü, pa indang constituency aser state renloktsü mesüra süngolu ayimba kin asoshi Kurmi-i ola adoka inyaka arur. Pai maneni par constituency aser state atema inyaktsü imlar” ta Assam CM-isa metetdaktsü.
Kurmi ya MLA kümsük pezübenbuba inyaker aser kü dang nungi pa Congress nung mapang talangba züngsema aruogo. Anungji pai iba party toktsüba atema kuli tejangjaba meteta alitsü, ta Sarma-isa ashi.
Rupjyoti ya taoba Congress minister Rupam Kurmi’er jabaso lir aser pai 2006 küm nungi Golaghat district kübok Mariani constituency nungi kümsük pezüben tashi MLA inyaka arur.
Taoba Congress minister aser Golaghat MLA Ajanta Neog-i assembly election matongdang BJP nung adenba sülen BJP nung adenba Congress MLA tanabubaji Rupjyoti Kurmi lir.
Ajanta Neog-i kasa constituency nung BJP candidate ka ama toktepa takok angu aser Assam nung mezüngbuba finance minister inyaktsü mapa lemzükogo.