BJP-i terenlok atema yazü nangzükba anentsüla: AAP Nagaland

Kohima, August 10 (TYO): Tawa BJP Organizing secretary I/c Nagaland, Ananta Narayan Mishra-i, linük nung aliba state 30 rongnung tesensaktiba state ji Nagaland lir, ta sangdongba dak sendakba nung AAP Nagaland-i telangzüba agüja, BJP-i terenlok atema yazü nangzükba anentsüla, ta aitsü.
Ananta-i, Nagaland sensakbaji Centre nungi aruba senotsü tim mesüi amshiba aser terenlok agi anüngba ajanga lir; iba den külemi BJP sorkari tenzükba scheme 150 dak tema nungi Nagaland-i tajangzük mangu, ta metetdakja liasü.
State nung tamakok jenti anguba atema state nung taoba yimtenren party tem aija pai, “BJP sorkar tashii arura Nagaland-i maongka ajak angutsü,” ta nangzük.
Iba dak sendakba nung tanü AP Nagaland Media cell-i sangdong ka ajanga, “AAP Nagaland-i Ananta Narayan Mishra indang yimtenren tangatetbatemji anema nokdaker. BJP sorkar tashii arura terenlok agütsütsü ta nangzüka pai Nagaland nung Hindu nunger yimsü nung BJP tangatetba ajungkettsütsü nükjidong yur inyaker,” ta aitsü.
“Ananta-i Nagaland ya state linük nung 30 rongnung tesensaktiba state lir ta sangdongbaji AAP-i sashia aitsür aser magizüker. Centre nungi senotsü aruba tim mesüi amshir ta pai yimtenren party tem aitsüba dak sendakba nung Nagaland nung BJP candidate tema tang ochimashi sorkar nung ya densema lir ta pai agizüktettsüla,” ta AAP Nagaland-isa metetdaktsü.
“BJP sorkar yimsüsüba kübok India nung aluyimer aika timtemdar, aser terenlok maliba state nung terenlok bener marutsütet, anungji Ananta-i Naga nunger dang yazü menangzüktsüla,” ta sangdong nungsa shia lir.
“AAP Nagaland-i Ananta dang ya asüngdangner: BJP-i secular kümzüka ayur aser tanga tamangba yimsü anema meinyaker ta jembiogo, süra kechiba RSS teloktemi nashi shi nokdangba tenüng amener Muslim nunger aika reshikangshir aser tepseter ?
Kechiba RSS-i Khristan pastor ka tekoklak nung kou ungtsü aser kangshia RSS yimyim ayimdaktsü? Kechiba Khrista shia aruba sentong akatsü atema Khristantem nem temelaba magütsü? Kechiba VHP patron Ashok Singhal-i yimjak nung 2020 tashi nungbo India ya Hindu linük ka akümtsü ta sangdong?” ta asüngdang.
AAP Nagaland-i BJP ama yimtenren party tem aser lenirtem dak tamang makar, shirnoki terenlok tenüngzükba nung ajemdaker Hindu yimsü ajungkettsütsü atema telung nung asalentong yanglua inyaker. AAP Nagaland-i yimtenren lenirtem aser yimtenren party tem anema meinyaker; tamangba yimsü aser sobaliba balala nungi sensotem nem tim temeten agütsüra lenir aser yimtenren party ji pelaa agizüker. Ajisüaka yinterenreen party mesüra lenirtem shirnoki tamangba yimsü tangatetba nung ajemdaker inyaker, itemji anema nokdaker, ta sangdong nungsa shia lir.
“Anungji AAP Nagaland-i Naga nunger dang, terenlok aser senotsü agütsütsü nangzükba nung ajemdaker tamannba tangatetba benoktsü nükjidong aliba yimtenren party tem mita kanga kümküma alitsü ayongzüker,” ta AAP Nagaland-isa metetdaktsü.