BJP-i tesempa ajanga India nunger tanela yirutsüogo: Shashi Tharoor

Mumbai, Rongchii 19 (Agencies): Congress MP aser taoba mapang Union minister, Shashi Tharoor-i, BJP-i maremzüktep aser tesempa ajanga India nunger tanela yirutsüogo, ta aitsü.
Mumbai nung All India Professionals Congress (APIC)-i ayongzükba sentong nung jembidang Tharoor-i, tesüiba mapangtem nungbo linük nung maremzüktep aser tesempa maliasü, ta ashi.
Kathua, Jammu & Kashmir nung arishi küm 8 tetsür chanu ka tashiyim amshia raksatsür tepsetba dak sendakba nung Tharoor-i, iba ama mapa tamajung inyakertem pusemba ajanga linük nüburtem kanga ain adokdaktsüogo, ta ashi.
Paisa, “Iba mapa ya tamangba yimsü tenüng nung inyak. Iba mapaji BJP mesüra sorkar party ajanga lir ta shingaia mashir, ajisüaka iba ya ajanga maremzüktep aser tesempa adokdaktsüogo,” ta ashi.
“Parnoki (BJP) rongsenkettsüng junga ketdang mesütetaka loktilibabo kümzüka ayutsüla, ajisüaka parnoki India’er tanela yirutsüogo,” ta MP, Tharoor-i ashi.
Centre nung BJP-i aniba NDA sorkar aija Tharoor-i, “Foreign policy nunga sorkari kecha meinyakaka tenüng tajung agitsü meranger,” ta ashi.
Congress party Tir, Rahul Gandhi-i election nüboyimba mapang tekülem kitem semdangba dak sendakba nung pai, Hindu tenüng nung nokdakertemji BJP-i parnok dang ama bilemer, ta aitsü.
Hindutva ya BJP indang yimtenren tangatetba ka lir; iba ya tamangba yimsü den sendaktepa mali, ta ashi.
Tharoor-i ashiba agi, tang linük nung democracy tashi itdaktsütsü kanga nüngdaker, kechiyong tawa media, judiciary aser bureaucracy anema inyakba kanga bulua kümdar.
2014 Lok Sabha election nung Congress-i menden ishika dang anguba aser state aika nung tamakok anguba dak sendakba nung pai, party-i tanaben asentenshitsü, ta ashi.
Kasa sentong nung Congress lenir, Milind Deora-i, party-i nüburtem den sendaktepba nung tamakok nguogo, ta nangzük.
Paisa, “Onoki taoba mapang aibelentem metongshidar,” ta ashi. Modi sorkari shinga den-a masüngdangtepi benokba mapatong kaji demonetisation lir, ta shia taoba mapang Lok Sabha nung MP, Milind-i, “Ibaji ajanga (BJP) sorkari tashi alia amshiba kuli sayur,” ta ashi.