BJP-i tiyazü nung aika nangzük: Union Minister Nitin Gadkari

New Delhi, Mongputeni/October 10 (Agencies): Reality show ka nung BJP lenir aser Union Minister, Nitin Gadkari-i, election matongdang BJP-i yazü aika nangzük, ta jembiba video ka Congress Tir, Rahul Gandhi-i lemsatep.
Twitter ajanga Gandhi-i, BJP sorkarji yazü aser tiyazü tenangzükbatem nung ajemdaker tentet ta Nitin-i kuli sayuogo, ta ashi.
Gandhi-isa Minister-i jembiba video ji lemsatep.
Marathi television channel ka nung Reality show nung jembidang Union Road & Transport Minister, Nitin Gadkari-i, 2014 küm BJP-i sorkar tentettsü ta asadangteta maliasü, ta ashi.
Nitin-i, “Onoki sorkar tashi mangutsü ta bilema liasü. Anungji ozü nisungtem tulu aika nangzüktsü benok. Tangbo nisungtemi onok dang onoki nangzükbatem atema asüngdanger saka onoki menütsür,” ta ashi.
Ano tasüngdangba balaka langzüdang Gadkari-i, party ji nüburtem matsüngdang teladak asütsü nüngdak, ta ashi.
Iba o nungji ajemdaker Congress-i, “Modi sorkarji tiyazü aser yazü tenangzükbatem nung ajemdaker amenok ta asenoki jembiba o Union Minister Nitin Gadkari-i pusemba atema pelar,” ta ashi.
Modi sorkar aija Gandhi-i, “Nai (Gadkari) jembibaji shidak. BJP-i par party-i sokrar tentettsü atema nüburtem mangdang amshi ta nüburtemia bilemer,” ta ashi.
Taküm Luroi/August ita nunga Nitin Gadkari-i, reservation ajanga sorkar mapa magutsütsü kechiyong linük nung mapa makai akumer, ta jembiba ajanga sorkar maaksüdakja liasü.