BJP-i tiyazü osang proker takok angu:Bora

Guwahati, May 20 (Agencies) : Assam nüjiso angüba sülen onoki tan mezüng yamai tamakok tulu anguba ya, nüburtem tia tamajungba kümogo aser mekümdangra tamajungba akümtsü ta BJP-i tiyazü olulu prokba ajanga lir,” ta Assam Congress Tatong Tir-i ashi.
“Onok tai ajanga onoki tamakok nguogo. Tan tamakok anguba ya lenir nungi tenzüker tanidaker ajak tai lir,” ta Assam Pradesh Congress Committee nung Tatong Tir Ripun Bora-i osangbenertem den jembidang ashi.
“Parnoki election nübuyimdang Assam nüburtem aser Hindu amangertem tia tamajungba kati odar ta jembi aser ibaji ajanga parnok ajangzükogo,” ta Bora-i ashi.
2014 küma Centre nung BJP-i tiyazü tenangzükba agütsür takok angu. Parnoki linük nübur shia indang bank account nung sen lakh 15 inoktsütsü ta tiyazü tenangzükba agütsü aser iba oji ajaki amanger parnok nem vote agütsü. Tangbo shingaia Modi aser par party-i nangzükba mamanger aser Assam nunga tarutsü nung iba kasa tensa ajurutsü,” ta Bora-i ashi.
Bora-i, “BJP-i lakh 25 agütsütsü nangzükba aser sorkar mapa inyakertem nem mapang shitak nung ita sen agütsütsü ta ashiba den tanga tesem nungi Assam nung jenoka aliba tebilemtsü reprangtsü nangzükbatem koba tashi ka nung takok ngua bener odir Congress-i kanga junga repranga atatsü,” ta ashi.
“Onoki joko 2019 Lok Sabha election atema meranga inyaktsü aser Centre nung Sonia Gandhi aser Rahul Gandhi na kübok sorkar kümtettsü tebilemba lir,” ta paisa ashi.