BJP-i Tripura nung takok tulu angutsü: Deodhar

Agartala, Tsüklai 09 (Agencies): BJP aser Indigenous People’s Front of Tripura (IPFT) teyaritep ajanga züngsem 60 agi akümba assembly nung shilem asemsü nungi anasü nung takok angutsü imlar, ta BJP atema Tripura state in-charge, Sunil Deodhar-i ashi.
Tsüklai 18 nü Tripura nung assembly election agitsü aser Metsüremi 3 nü vote azüngtsü.
Tripura nung Left sorkar tesüiba küm 25 tashi khen danga methitemi sorkar ketdangsüa arur aser BJP-i Left sorkar atsüngdoktsü meranger.
“Narendra Modi-i Tsüklai 8 nü sentong ana nung jembiba aser Tsüklai 15 nü ano sentong nung jembiba sülen onoki menden teimba nung takok angutsü,” ta Deodhar-i ashi.
2014 Lok Sabha election mapang Deodhar ya Varanasi nung Prime Minister Narendra Modi indang poll manager inyak aser paisa ashiba agi, “election magidang party-i CM candidate mesangdongtsü kechiyong onok indang alizüngji Left sorkar atsüngdoktsüba lir.”
Manik Sarkar ya tesüiba küm 20 tashi chief minister inyaka arur aser pa tenüng menükogo aser nübortemi sendokgo, ta paisa shisem.
“Left Front-i tang ama ya opposition tesashi majurudang. Left-i Tripura nung tang mezüng chichiba party den rarar. Onok ket nung lanur lenir aser züngsemtem lir saka Left Front nung taintem aser küm 25 tashi ochimashi inyakertem dena lir” ta Deodhar-isa metetdaktsü.