New Delhi, January 9 (Agencies) : Delhi University nung BJP-i Ramjanmabhoomi Temple atema shisatokden sentong ka ayongzüka agiba atema Delhi nung Aam Aadmi Party (AAP)-i BJP aitsüogo.
BJP-i university tem nung lokti nung telemsa adokdaktsütsü indang osang prokshir aser iba shisatokden agiba ya 2017 küm Uttar Pradesh assembly elections dak rangloker inyakba mapa ka lir ta AAP-i aitsü.
Honibarnep BJP lennir Subramanian Swamy-i ‘Shri Ram Janma Bhoomi Temple: Emerging Scenario’ ta ser Ram tekülem ki indang onük ka jembi.
Iba sentong ya Delhi University nung Arundhati Vashishtha Anusandhan Peeth (AVAP) ajanga arts faculty nung ayongzüka agi. AVAP ya asür VHP lennir Ashok Singhal-i tentetba research organization ka lir.
Iba sentong agiba kima nung nisungtem adenshia lungkak aitaka Swamy-i Ram tekülem ki indang onük jembi.
“DU nung Ram Mandir indang onük jembiba anema onoki menoktaker, kechiyong university temji tangatetba tajung nung onük balala jembidak tesem lir. Ajisüaka, shisatokden sentong nung lokti nung telemsa adoktsüsa o jembibaji magizüker” ta AAP tongti lennir Ashutosh-i osangbener dang ashi.
“Taoba Lok Sabha elections matongdang Muzaffarnagar nung telok balala tsüngda mepetmesü adok. Ano Delhi elections matongdang telok balala tsüngda mepetmesü adok. Bihar elections matongdang Dadri tatalokba liasü aser tang Uttar Pradesh elections atongtsü lia nenok (BJP)-i Ram Mandir ken o ano lepa bener arur” ta Ashutosh-isa BJP aija ashi.
“Tamangba yimsü indang masü saka chiyungtsü, sübosolemtsü aser tejennokdak atema yimtenren mapa inyakdaktsünür” ta paisa metetdaktsü.
You must be logged in to post a comment Login