BJP-i UP & Uttarakhand nung aser Congress-i Punjab nung takok tulu angu; Goa & Manipur nungbo menden peria mangu

New Delhi, March 11 (Agencies) : Honibarnü Uttar Pradesh aser Uttarakhand nung BJP-i takok tulu nguogo aser külen Congress-ia Punjab nung kasa takok ngua liasü. Congress-isa Goa aser Manipur nunga menden teimba ngutet saka state anaprong nung sorkar akümtsüsabo parnoki menden mongutet.
Otsüsütsü aketba results ajanga India yimtenren nung temelenshi tulu bener arutsü ta Bharatiya Janata Party (BJP)-i metetdaktsüogo aser Congress-ia Prime Minister Narendra Modi pusema takok anguba atema aoksar ta shiogo.
UP aser Uttarakhand nung PM Modi aser party president Amit Shah nati anir election dak sendakba maparen inyaka liasü. Uttarakhand nungbo nüngtugu Congress Chief Minister Harish Rawat-i menden ana nungi toktepba nung ka nungdanga takok mangu.
Küm 15 sülen BJP-i Uttar Pradesh nung sorkar akümtsü tashi angur asütsü. Iba mapang regional party ana- SP aser BSP nati sorkar melentepa ketdangsüa aru.
Züngsem 403 agi akümba Uttar Pradesh assembly nung BJP-i menden 324 nung takok nguogo. BJP-i takok tulu anguba ajanga Samajwadi Party aser parnok den yaritepr Congress nati menden 55 nung dang takok angu aser külen Bahujan Samaj Party (BSP)-i menden 19 nung dang takok ngutetogo.
Elections osang angashiba sülen Samajwadi Party lennir aser Chief Minister, Akhilesh Yadav-i menden toktsü. Külen BSP lennir Mayawati-ibo Electronic Voting Machines (EVMs) nung tim mesüi inyakba ajanga BJP-i takok tulu angu ta tai tongloktsüogo.
“BJP nem otsü asütsüsa takok ngudaktsüba ajanga India yimtenren mapa nung temelenshi tulu adoktsü. Iba ajanga kin, kibong aser tejak repranga yimsü asüba inyakyimtem anentsü” ta BJP President, Amit Shah-i metetdaktsü.
BJP-i Uttar Pradesh, Uttarakhand, Goa aser Manipur nung sorkar akümtsü, ta paisa shisem.
Uttarakhand nung Congress sorkar liasü saka parnoki election nung tamakok tulu nguogo. Menden 70 assembly nung BJP-i menden 57 nung takok angu aser takok angurtem rongnung BJP nung adenba Congress lennir tejentema dena lir.
Uttarakhand nung Congress-i menden 11 nungdang takok angu aser Chief Minister Harish Rawat-i menden ana nungi toktepba nung ka nungdanga takok mongutet.
“Iba ya tetsükdaktsü tulu ka lir. Onoki Uttar Pradesh atema mepelar” ta Congress otongdar, Sanjay Jha-i ashi. Külen Congress lennir Sandeep Dikshit-ia, “Ozü telok terata ka nung lir” ta metetdaktsü
Ajisüaka, tang Congress lennirtemi Congress Vice President, Rahul Gandhi pusema jembiogo aser Uttar Pradesh nung tamakok anguba atema pa dak dang tai metongoktsütsüla ta parnoki ashir.
BJP sorkari yimsü asüba Goa nung ‘hung assembly’ asütsü akok ta bilemer, kechiyong Congress aser BJP naprongi sorkar akümtsü ta kuli agütsüteper.
Züngsem 40 agi akümba assembly nung Congress-i menden 17 nung aser BJP-i menden 13 nung takok angu. Goa nung sorkar akümtsü atema joko Goa Forward aser MGP telok ket nungdang tashi lir.
Manipur nunga Congress-i menden 28 nung takok angu saka parnoki sorkar akümtsüsa menden mongutet. Congress sülen BJP-i menden 21, National People’s Party o Naga People’s Front (NPF) nati menden pezüsü aser Lok Janshakti Party o All India Trinamool Congress nati menden kaka aser Independent candidate kati takok angu.
Punjab nung küm 10 shi opposition nungdang mena aruba sülen Congress-i takok tulu nguogo. Parnoki Shiromani Akali Dal-BJP teloktem aser ano AAP madak takokji angu.
Taoba Chief Minister, Amarinder Singh lenisüba kübok Congress-i menden 117 nungi 77 nung takok angu. Congress sülen AAP-i menden 22 nung takok angu aser parnok Assembly nung opposition tongtiba asütsü.
Akali Dal aser BJP telok nati menden 18 nungdang takok angu aser teinyakdak minister 10-i kanga mejungi tamakok angu.
Tanü Prime Minister Modi-i Amarinder Singh den phone ajanga tenüngsang agüja liasü.
Uttar Pradesh nung BJP-i jila aser yimtsüng jenjang nunga takok angu aser parnoki kin o kin lemsar yimten mapa inyakba samatsüa takok anguba ama ajiteter.
Lucknow, Allahabad, Kanpur aser Modi’er Lok Sabha constituency Varanasi nung BJP candidate temi takok tulu angu.
Congress-ia Rae Bareli nungbo tamakok balala mangu saka Rahul Gandhi’er Lok Sabha menden Amethi nungbo kanga mejungi tamakok angu.
“Modi’er sorkari mapa tajung inyakogo aser (BJP President) Amit Shah indang asalentong ajanga tajangzük tulu nguogo” ta BJP lennir Yogi Adityanath-i osangbener dang ashi.