BJP-i UP nung ‘majority’ ngua sorkar tentettsü: Amit Shah

Gorakhpur (Uttar Pradesh), February 18 (Agencies): Deobarnü Uttar Pradesh assembly election tasembuba shilem agitsü lia tanü Honibarnü BJP National Tir, Amit Shah-i, March 11, 2017 sülenbo Uttar Pradesh nung lenla ajaklen terenlok alitsü, kechiyong party-i election nung majority ngua sorkar tentettsü, ta metetdaktsü.
Gorakhpur nung osangbenertem senden ka nung jembidang Shah-i, state nüburtemi BJP sorkar nem vote agütsütsü telemtetba agiogo, aser opposition party tem- BSP aser SP-Congress teloktepi tamakok angutsü, ta ashi.
“Tesüiba küm pongu nung SP sorkar kübok UP nung mepetmesü jenti lir aser parnoki tang Congress den loktepbaji tamakok atema lir,” ta paisa ashi.
Paisa, BSP tongti Mayawati-i kecha meinyaker, saka Dalit nunger atema amajok nung dang jembir, ta aitsü.
UP assembly election mezüngbuba aser tanabuba shilem nung aikati Bharatiya Janata Party pusemogo ta shia Shah-i, UP nung BJP sorkar arutsü temaitsü tejangja angur, ta ashi.
Paisa, Poorvanchal, Bundelkhand mesüra central UP nung BJP-i vote aika angutsü, ta metetdaktsü.