BJP-i UP nunga 2014 Lok Sabha ama takok angutsü: Arun Jaitley

Varanasi, March 02 (Agencies): Bharatiya Janata Party-i 2014 küm Lok Sabha election nung takok anguba amai Uttar Pradesh assembly election nunga takok ngua sorkar akumtsü, ta Bodhbar aonung Union Finance Minister, Arun Jaitley-i ashi.
Shishilembartem senden ka nung jembidang pai Centre sorkari demonetisation telemtetba agiba tenüngsanga, nüburtem aikati iba telemtetba pusemogo, ta ashi.
“Linük nüburtem atema demonetisation scheme ya tajungtiba liasü. Yimtsüng nung alirtemi mapang ka nungbo onok nem vote magütsü, ajisüaka iba (demonetization) telemtetba ajanga tangbo parnokia onok nem vote agutsüogo. Ozü party-i tasü itta demonetization mera agi, koba ajanga linük rongsenkettsüng tashi aittsü,” ta Union Minister-isa ashi.
“Alima nung rongsenkettsüng tekaratiba ainba linükji India linük lir ta alimai agizüktetogo,” ta paisa ashi.
Tang tagidak Uttar Pradesh Assembly election dak sentakba nung BJP lenir aser Union minister-isa, “2014 Lok Sabha election nung takok anguba ama taruba Uttar Pradesh sorkarji BJP-i majority ngua akumtsü,” ta ashi.
Uttar Pradesh assembly election nung BJP-i chief minister candidate mesangdongba atema opposition party temi aitsüba dak sentakba nung Jaitley-i, vote agutsütsüpurtemi 2014 Lok Sabha election matongdangyongi Narendra Modi shimogo, ta ashi.
“2014 Lok Sabha election mapang nung linük nung vote agutsütsüpurtemi mezüng Modi agizüktet, iba sülen Bharatiya Janata Party-i pa agizük aser tesüsa Parliamentary Board-i pa shim, iba sülena onoki election aika nung takok nguogo,” ta pai ashi.
Congress Party aija Jaitley-i, “2014 Lok Sabha election nungbo Congress-i menden 44 dang angu, kechiyong parnoki linük atema masü saka parnok tajangzük angutsü atema dang inyak,” ta aitsü.
“Tangbo BJP ya India party ka kümogo,” ta paisa ashi.
Samajwadi Party lenir aser Uttar Pradesh Chief Minister, Akhilesh Yadav-i ozüng alema aibelena alir candidates nem party ticket agutsür aser kin-kidong nung ajemdaker politics asayar, ta Union Minister-isa aitsü.
“Akhilesh-i state nung expressway ka atema nümatanga jembir, ajisüaka Union Minister Nitin Gadkari-ibo Uttar Pradesh sorkari expressway atema agutsüba tender rate tesadang nung highways 255 yanglur,” ta paisa metetdaktsü.