BJP-i voters mesüzüktsü meranger: Kharge

New Delhi, February 01 (Agencies): Tanep Parliament nung 2019-20 küm atema Centre sorkari Union Budget benokba sülen Lok Sabha nung Congress lenir, Mallikarjun Kharge-i, iba budget ya BJP indang election manifesto lir; Lok Sabha election jelia parnoki voters nem sübokrem agutsütsü meranger, ta aitsü.
Tanü Parliament kima osangbenertem den jembidang Kharge-i, iba budget nung BJP-i nangzükbatemji election atema lir aser tiyazü tenangzükbatem lir, kechiyong itemji mataloktsütsü, kechiaser BJP-i taküm May ita tashi dang yimsü asütsü, ta ashi.
Lok Sabha elections April-May ita nung agitsü.
Kharge-i, “Ni ashitsü agibo, tanü budget ya BJP indang election manifesto lir. Iba ya elections atema inyak. Parnoki voters nem sübokrem agutsür, ta ni odiodia aitsür,” ta ashi.
Kharge-i ashiba agi, BJP-i parnoki yimsüsüba mapang inyaktetba mapatem aser küm pongu tsüngda parnoki nangzükba kwi ataloktsüar parnoki nüburtem nem memetetdaktsü.
Parnoki nisung shia bank account nung sen lakh 15 inoktsütsü nangzükba indang parnoki mejembir, iba denji külemi küm pongu tsüngda parnoki mapa crore 10 agutsütsü nangzükba indangbo mejembir, ta paisa ashi.
“Iba ya (budget) election atema yazü nangzükbatem dang lir, kechiyong tesüiba mapangtem nunga parnoki yazü dang jembi,” ta pai ashi.
“Parnoki inyakba ajak nung politics lir, aser iba budget nung sensakertem atemabo kecha mali. Iba budget ya BJP-i Parliament nung zünga metetdaktsüba election manifesto ka dang lir, aser vote angutsü atema inyakba lir. Nüburtemi joko parnok nem mashiokdaktsütsü ta angatetogo,” ta paisa metetdaktsü.
Congress lenirisa, par sorkar nung terenlok kecha maliasü, aser tarutsü nunga parnoki nüburtem tajangzük angutsü atema kecha meinyaktsü, ta ashi.
“BJP-i parnoki votes angutsü ta bilemer, ajisüaka nüburtemi joko angatetogo, kechiyong taoba mapang nung parnoki ashioktsüogo, joko mashiokdaktsütsü ta nisungtemi angatetogo,” ta pai ashi.
“Nenok (BJP)-i May ita tashi dang yimsü asütsü, ajisüaka parnoki election temelung nung yur küm ka piyong atema budget benoka linük nüburtem ashioktsütsü meranger,” ta paisa shisem.