BJP-i yimsüsüba state Haryana nung shi ayokba nokdanger

New Delhi, September 12 (Agencies): BJP-i yimsüsüba state tem nung shi ayokba nokdanga arudagi aser tanü shi nokdangba state pongububaji Haryana kümogo.
ANI osang ajanga ashiba agi, September 11 nungi 18 nü tashi state nung shi mayoktsü atema Haryana sorkari sangdongogo.
Paryushan benjung amungdang tamalen Gujarat, Maharashtra, Rajasthan aser Chhattisgarh state tem nunga shi ayokba nokdanga liasü.
Ano shi nokdangba state pezübubaji Chhattisgarh state lir.
‘Ganesh Chaturthi’ benjung aser lumia sarasademba nüngtem nung anogo ti nü state nung shi mayoktsü atema Hokolbar nü Chhattisgarh sorkari sangdonga liasü.
Iba dak sentakba nung opposition party tem aser lokti atema inyaker aikati BJP aija, parnoki nüburtem dang kechi achitsüla mesüra kechi machitsüla’ar metuyutsüla, ta ashi.
Ano külen Hokolbar nü BMC-i Bombay high court dang Mumbai nung anogo ana shi lepa ayoktsü melaogo, ta metetdakjka liasü.
Ajisüaka high court-i, nisung temeyoktep aika adenshia aliba Mumbai ama yimti tulu ka nung tamangba benjung mapang shi ayoktsü atema anogo aika menokdangtsüla, ta shiogo.