BJP Karnataka-i ‘North East Sambesh’ ayongzük

Nagaland State BJP President Visasolie Lhoungu, Deputy Chief Minister  Y. Patton, All India BJP General Secretary(Org) Ramlal aser North East nungi lennirtem agiba noksa ka angur.

Dimapur, Monupii (May) 7 (TYO): Monupii (May) 6, 2018 nü Bharatiya Janata Party Karnataka-i Bengaluru nung aliba North east nunger atema ‘North East Sambesh’ ta ser sentong ka ayonga agi.
Sentong nung northeast kübok state balala nungi nisung 10,000 shi aden aser tongti o jembirji All India BJP General Secretary, Ramlal liasü.
Nagaland, Assam, Meghalaya aser Arunachal Pradesh nungi BJP Minister tema iba sentong nung aden.
South India nung pei pei state nungi Minister temi pei nisungtem den sensaksemba sentong mezüngbubaji iba ya liasü, ta Media Cell BJP Nagaland sangdong ka nung metetdaktsü.
Bharatiya Janata Party Nagaland tenüng nung o jembidang Deputy Chief Minister, Y .Patton-i “Northeast nung alirtemi temelenshi aginüba atema BJP nem vote agütsüogo anungji Karnataka nung alirtemia temelenshi aginür BJP nem vote agüjang” ta ayongzük.
Karnataka Election coordinator Dr. HM Chandrasekhar-i anir State Bharatiya Janata Party (BJP) Nagaland nungi aoertemi Mount Zion Pentecostal International Church, RK Puram, Bengaluru nung Khristan lennirtem den ajurutep.
Iba sentong nung Karnataka Christian federation Chairman, Bishop Francis Jackson dena aden.
BJP Nagaland tenüng nung taoba State BJP tir Dr M.Chuba Ao aser State General Jaangsillung nati shilem agi.
Secretary Organisation Ananta Mishra, Medical Minister Pangnyu Phom aser Higher and Technical education Minister Temjen Imna nungertema iba sentong nung aden.