BJP ket nung nübo peria lir : Manipur Governor Heptulla

New Delhi, March 14 (Agencies) : Mongulbarnü Manipur Governor, Najma Heptulla-i Manipur nung sorkar akümtsü atema Bharatiya Janata Party (BJP) jaokba medena jembi.
“Hau Congress-i menden teimba angu ta ni meteta lir, saka iba jagi sorkar akümtsü makok. Sorkar akümtsü telemtetba agitsübaji Governor indang tebilemtsü lir aser ibaji Linük Temzüng nung tashi agüja lir. Züngsem 60 agi akümba Assembly nung BJP ket nung nübo 30 dak tema lir aser Manipur nung tashitait sorkar ka ajanga teyari agütsütsü” ta Heptulla-i ashi.
Congress-i ashishitepba atema osangbenertemi asüngdangdang, “State ajangzüktsü atema Governor-i shirnok ket nung nübo teimba lir ta asüba metettsü aser telemtetba agitsü atema Supreme Court-i oshidang agütsüogo” ta lai langzü.
Manipur nung BJP-i aniba sorkar jaoka tekaratiba nung parnok nübo reprangdangtsü, ta Heptulla-isa ashi.
Ajisüaka, Governor-i Manipur nung BJP sorkar akümtsü jaokba atema Congress-i anema nokdaker.
“March 12 nü Congress-i National People’s Party (NPP) President indang shidi ka dena Governor dang sorkar akümtsü nübo peria lir ta zülu” ta Congress lennir Abhishek Manu Singhvi-i tanü ashi.
“BJP-i Governor tem ajanga sorkar akümtsü nung mongin kümdar. Nübortemi ang sorkar kümteter” ta Singhvi-i Centre aija jembi.
“Sarkaria Commission ajanga menden teimba anguba party nem sorkar akümtsü atema mezüng maongka agütsütsüla shia lir” ta paisa shisem.
Iba anema Heptulla-i ashiba agi, “Ni küm 37 tashi Parliament nung inyaka arudang aser ni Congress aser non-Congress sorkartem den inyaka arudang, kü dak yamai tai metongloktsüdang. Ni indangindanga inyakba nisung ka lir aser ozüng nung aliba ama inyaker.”
“Manipur nung terenlok aika nüngdaker. Aika inyaktsü lir. Asüng (Bodbar) tenangzüktsü aliba sorkari maneni terenlok mapa inyaktsü imlar” ta Heptulla-isa ashi.
Bodbar nikongdang 1:00 ako nung Raj Bhavan nung tenangzükba agiba sentong agitsü.
Tanü Naga People’s Front (NPF) nungi MLA pezüi Heptulla den ajurutep aser parnoki BJP pusema nungiter ta metetdaktsü. Ano, National People’s Party (NPP) MLA pezüia BJP pusema nungitba metetdaktsüogo.
Manipur nung züngsem 60 agi akümba Assembly nung MLA 32 parnok den lir ta BJP-i kuli agütsür.
Raj Bhavan osang ka ajanga ashiba agi, Governor-i NPF MLA tem den tsüngdong ajurutepa parnoki BJP nungitba kuli metetnüa liasü.
Hombarnü BJP Manipur legislature party lennir inyaktsü atema Nongthombam Biren Singh shim.
Asüng Biren Singh den council of ministers-i tenangzükba agitsü. Iba sentong nung BJP President Amit Shah aser Union minister Jitendra Singh na adentsü ta osang angazüker.