BJP kijai sorkar mekümteter

Taoba küm 20 tsüngda Bharatiya Janata Party (BJP)-i aniba National Democratic Alliance (NDA) teloktep nung BJP indang tashi melenshia arur. Taoba Prime Minister aser BJP lennir AB Vajpayee lenisüba kübok Parliament nung BJP nübo peria maliasü aser iba jagi parnok den yaritepba yimtenren teloktemi ang telemtetba agiba nung tongti shilem agi aser tashi-a yamaji bena liasü. Ajisüaka, 2014 küm BJP-i parnok nübo peria sorkar akümtsü tashi anguba sülen parnok den yaritepba teloktem dak kangabo memetaloki aküm. Ajisüaka, Prime Minister Narendra Modi-i parnok nem Cabinet mendentem lemzükja liasü. Taküm Lok Sabha elections sülen, BJP aser parnok den yaritepba teloktem tsüngda medemdangdang, BJP-i tashi tuluba nguteta liasü. Iba ajanga sorkar nung BJP den yaritepertem aika maniok aser party ajaki BJP-i takok tuluba angubaji Modi sentsü ajanga liasü ta ajitet. Saka tawa Maharashtra aser Haryana assembly election tem nung BJP indang tashi tera melenshitsüsa kümdaktsüogo. Haryana nung BJP-i menden teimba nung takok angu saka sorkar akümtsü atema nübo agi meperi. BJP-i sorkar akümtsü atema Dushyant Chautala-i aniba Jannayak Janata Party (JJP)-i yari saka iba ya odangbo yariba masü, kechiyong BJP-i Chautala nem deputy chief minister agütsütsüsa aküm. BJP atema tashi melenshitsüsa tia ka ajurubaji Maharashtra nung kanga ajiteter. Idakji Shiv Sena-i 2014 tejakdang nungi BJP den tesentaktep yur yaritepa arur. Ajisüaka, taoba küm pungu tsüngda parnok state nung BJP kanga ainba atema parnok jashir aser talisa BJP lennir Devendra Fadnavis kübok parnok inyaktsüsa akümba atema parnok mepelai aru. Taküm assembly elections nung Shiv Sena-i menden tajemba nung tokteptsüsa aküm saka result adokba sülen parnok ola adoktsü maongka ka angu. Taküm Maharashtra nung BJP-i taoba election dang nungi menden tajemba nung takok angu aser iba jagi Shiv Sena indang teyari kanga nüngdaka kümogo. Iba maongka agia Shiv Sena-i parnok lennir Aaditya Thackeray-i BJP den melentepa chief minister inyakdaktsütsü akhanger. Ajisüaka, BJP-i parnok menden teimba nung takok anguji ibajibo tamakoktsü ta tekong meranger. Maharashtra nung BJP aser Shiv Sena tsüngda tekong merangtepa aruba angatetteptsü atema mapang agitsü, saka iba ajanga tang linük nung BJP dak tashi tulu liaka, parnoki tangar teyari nüngdaker ta asüba kuli sayur. Haryana aser Maharashtra state tem indang dang jembir, saka asenoki meyipa reprangdangra, India kübok state aika nung BJP-i tangar teyari agiba ajanga dang teloktep sorkartem kümteter yimsü süa aruba angur.