BJP lenir Advani kinungtsü Kamla süogo

New Delhi, April 06 (Agencies) : BJP lenir tejen LK Advani kinungtsü, Kamla Advani Bodhbarnü temulungjang tashidak agi süogo. La arishi küm 83 liasü.
“Advani kinungtsü ya temulungjang nung timtem adokba ajanga AIIMS mozü kidangi anir aru. La mozükidang asü,” ta All India Institute of Medical Sciences nung doctor kati ashi.
Lai la temang jangra matemer aser tango junga mesashiteter ta ashiba ajanga Delhi nung aliba AIIMS mozü kidangi anir ao, ta lar kinungertemi ashi.
Kinungbo den jabaso ka aser jala ka ta toktsür la iba lima nungi pilaogo.
Kamla Advani ya tain akümba ajanga mapang tatsü ka temang nung timtema liasü aser ibaji ajanga ita ishika wheel chair nung dang liasü.
La joko kanga amatari bulua liasü, ta lar kinungertemisa ashi.
La asüba osang angashia linük Ato Kilonser Narendra Modi aser tongtibang nisung aikati L.K. Advani den asüko lemsatepogo.
“Kamla Advani asüba osang angashia temulung kanga nemjema bilemer. Lai ‘karyakartas’ inyakyim kanga ajungmeso aser L.K. Advani atema nükdang tajung ka liasü. Ni Kamla Advani den aiben sensakasemba bilemteter. Tang ama mulungzürep mapang ka nung nia Advani’er kibong den lir. La tanela süngjema anisüngzükdakjang ma,” ta Modi-i twitter ajanga lemsatepogo.
Home Minister Rajnath Singh-i, “Kamla Advani asüba ajanga temulung kanga raksar. Iba shisa bulu koktettsü atema Tsüngremi L.K. Advani aser par kibüng nem tesünep shisatsü den tasü tait tanela agüjangma,” ta twitter ajanga ashi.
West Bengal Chief Minister Mamata Banerjee-i asür kibong den asüko lemsatepogo.
Lai, “Kamla Advani asüba ajanga temulung kanga shiranger. La asüba ya Advani’er kibong asoshi takoksa tulu lir. Ni lar kibong den asüko lemsateper,” ta twitter ajanga lemsatep.
BJP Tir Amit Shah-i, “Kamla Advani asüba osang angashia temulung kanga shiranger. Tsüngremi asür kibong nem tesüneptsüba agüjangma,” ta twitter ajanga ashi.