BJP lenir ka kidang nungi prangbong injang apu

Agartala, Aenjeti 26 (Agencies): BSF sepaitemi Yangtepnü Dhanpur constituency kübok Tarapur tesem nung ki ka nungi pistol ka den injang aser ozüng alema benshiba temesepba mozü puogo.
Dhanpur ya taoba küm 20 tashi Tripura chief minister Manik Sarkar’er constituency lir aser pa taruba election nunga kasa menden nungi tokteptsü.
BSF, 145 battalion Commandant Ganesh Kumar-i osangbenertem dang ashiba agi, osang tejangja ka angazükba sülen sepaitemi Tarapur tesem nung arishi küm 45 tain Abdul Rahman’er kidang nungi prangbong aser injang ya ngutet. Iba tesem ya India aser Bangladesh arrtsü anasa lir, ta paisa ashi.
Iba den külemi tenokdangba agütsür aliba cough syrup, Phensidyl bottle 250, temesepba mozü 450, Bangladeshi Taka 10,402 aser sen lakh 2.1 dak nungi tali Rahman’er kidang ngutet.
Pua aruba osettem ajak local police station nung bendanga agütsüogo.
Superintendent of police (Sepahijala) Sudipta Das-i ashiba agi, Rahman puogo aser obendang daki anir ogo.
Kumar-isa ashiba agi, Tripura nung Assembly election magi tsüngda India-Bangladesh arrtsü adena prangbong injang aika shibelener arutsü, ta BSF pur nem osang agütsüogo.
Kathalia panchayat samity mendenbuba aser CPM lenir Abdul Karim-i ashiba agi, Rahman ya BJP züngsem ka lir. Rahman 2015 küm panchayat elections nung BJP candidate ka ama shilem agiogo.
Karim-isa ashiba agi, BJP züngsem ka kidang nungi prangbong injang ngutetba ajanga opposition party puri Tripura nung election mapang timtem adokdaktsütsü asoshi merangba tuteta sayuogo.