BJP lenir Kailash Vijayvargiya-i Shahrukh aitsü

New Delhi, January 24 (Agencies): Vadodara railway station, Gujarat nung nisung ka Shahrukh Khan reprangtsü atema nungtepdang temulungjang nungbanga asü. Iba ken o nung Mongulbarnü BJP National General Secretary, Kailash Vijayvargiya-i Shahrukh aitsü.
“Film yanglua ajungkettsüji kanga tongtibang, saka iba mapa inyakdang nisüngtem atema bilema inyaktsüla. Nisungtemi pa sapua reprangi sentepba agi, pa nüngtugu akümbaji meshisangdaktsütsüla,” ta pai ashi.
Delhi BJP telen nung tekolakba Manoj Tiwari-i iba tatalokba asoshi nemjema bilemba lemsatep. Iba den külemi Shahrukh-i tasür kinunger nem teyari agütsütsüla, ta pai ashi. “Shahrukh-i pa sapurtem dang kümdangtsü asoshi ashitsüla,” ta pai maneni shisem.
“Kailash-i shinübaji kechiar memetet saka aiben pai ashiba o tem mashi angateter,” ta Tiwari-i Kailash sema ashi.
Iba tatalokba Shahrukh Khan dak metongloktsütsüla, ta BJP national otongdar Shaina NC-i Vijayvargiya ashiba o aija ashi.
“Iba tatalokba ya Shahrukh Khan dang matongtsüla, saka railway ministry aser ketdangsertemi ozüng shidak amshia lokti mazüokba ajanga lir. Railway nung ketdangsertemi mapa shitak meinyakba ajanga tanga mapang nunga tasüba aika atalokogo. Kailash Vijayvargiya, süra kechiba Suresh Prabhu maitsü,” ta lai asüngdang.
Khan Mumbai nungi Delhi-i pa film ajungketba sentong asoshi aodang pa sapurtem Vadodara station nung pa reprangtsü asoshi aika sentep. Train Vadodara station nung khen anenzükdang nisungtem mazüokteti akümba ajanga police tem-i lathicharge asü.