BJP lenir kar nem temerenshi agütsütsü nung obang meputeper

New Delhi, November 12 (Agencies): Bihar assembly election nung tamakok anguba dak sentakba nung Ato kilonser, Narendra Modi aser BJP Tir, Amit Shah na anema jembir BJP lenirtem nem temerenshi agütsütsü onük nung BJP bangdak lenirtem obang meputeper, aser lenirtem rongnung Union Homme Minister Rajnath Singh-ibo party anema jembir lenirtem nem temerenshi magütsüner.

Yashi Union minister Nitin Gadkari-i Modi aser Shah na sashia pursema, lenir anema jembir party lenirtem nem temerenshi agütsütsüla, ta jembiogo.

Party osang ajanga ashiba agi, Rajnath Singh tangatetbaji- party lenir tain L K Advani aser Murli Manohar Joshi nungeri aika ajangshia aruogo aser BJP ainba nung shilem tulu agiogo, anungji parnoki jembiba oji party-i shisadangtsüla.

Home Minister Rajnath-i, party lenir taintemi jembiba oji junga shisadangtsüla aser BJP jenjang ajungtsü atema ajaki agizüktettsüsa telemtetba agitsüla, ta shiogo.

BJP lenir tain Advani, Joshi, Shanta Kumar aser Yashwant Sinha nungeri Bihar election tamakok atema Modi aser Shah na aija tamakok anguba kuli jungjunga bushisüngdangtsüla ta akhanger. Ano külen BJP Lok Sabha MP, Shatrughan Sinha-ia, Bihar election nung tamakok anguba bentettsü khuret nungi party-i jena maotsüla, ta jembiogo.